KUCHING: Pengelandik jaku isyarat ba bala pengajar di SeDidik terus nerima perati Opis Menteri Pemansang Indu, Nembiak Mit enggau Pengelantang Komuniti (KPWK) kenyau ari dikena urung taun 2021.
Menteri KPWK, Datuk Seri Fatimah Abdullah madah, nya mega nunjukka pekara manah lebuh naka diatu bisi 163 pengajar di palan pelajar tumu nembiak mit nya landik ngena jaku isyarat.
Pekara nya ku iya, ulih dipeda lebuh nyada ke lagu Negaraku enggau Ibu Pertiwiku ke mega ngena jaku isyarat rambau program rasmi diatur SeDidik.
“Puji Tuhan, kenyau ari jaku issyarat tu dikena, bala pengajar ulih nunjukka diri landik ngena jaku tu.
“Kelimpah ari nya, kitai mega ulih nunjuk ngagai komuniti ke alai bala nembiak SeDidik landik nyada ke lagu Negaraku enggau Ibu Pertiwiku ngena jaku isyarat sereta jaku ke nyamai dikena ba pengidup besehari sehari,” terang iya.
Fatimah bejaku munyi nya lebuh ngulu Pengerami Apresiasyen SeDidik serimbai Genap Taun Ke-33 di Hotel Riverside Majestic, ditu, malam tadi.
Iya madah baru, SeDidik udah bejalaika pengawa pemadu manah sida nambahka pengelandik ngena jaku isyarat ngaul bala pengajar enggau nembiak.
“Tu mega siti ari penyulut dijapai ti ngemegahka kitai lalu pekara tu mega seraris enggau mungkur semua dalam pelajar tumu nembiak mit nengah polisi nerima semua,” ku Fatimah.
