Sejarah Kanang meruan dikenang

KUCHING: Rambai jaku ‘Agi Idup Agi Ngelaban’ seruran nyadika peransang semengat anak Iban ti digelar Kanang anak Langkau siku soldadu ti nempa sejarah Malaysia laban ti sanggup begadai nyawa ngelaban munsuh.

PW I Niang Temenggong Datuk Kanang Langkau (2 March 1945 – 3 Januari 2013) tebilang nama sereta dipadu nyadi bujang berani lebuh sejarah pasal pemerani iya ti ngelaban munsuh ba taun 1980 ti ngujungka gulung perut iya teberunsai ketegal ditimbak munsuh maya nya.

Nyentukka diatu, sejarah Kanang tu enda lenyau lalu seruran dikenang sebagi ari peransang nembiak sereta mensia mayuh kelebih agi bansa Iban nyadi kelai soldadu ti pemadu sayauka menua.

Nerima anugerah Sri Pahlawan Perkasa (SP) enggau Panglima Gagah Berani (PGB) ari Yang Di-Pertuan Agong Sultan Ahmad Shah kena Jun 1981 kisah sejarah Kanang lalu dikarang Maznan Noordin ba bup dikumbai ‘Kanang:

Cerita Seorang Pahlawan’ ba taun 1988 lalu ditulis baru ba taun 2010, nyadi sebagi ari bup komsas ti meseti dibacha nembiak sekula Pom Tiga ti ngambi peresa Penilaian Menengah Rendah (PMR).

PW I Niang Temenggong Datuk Kanang Langkau

Udah nya, cherita Kanang lalu difilemka kena 2017 ti dikumbai ‘Kanang anak Langkau: The Iban Warrior’ ditengkebang siku pengarah tebilang Bade Azmi lalu dikeluarka Tangan Seni Sdn. Bhd.

Deka ngetanka penulin filem sereta meri tanda basa besai menua Malaysia anak Kanang empu iya nya Langgi Kanang diambi megai watak Kanang dalam filem ti dipandang kena 16 March 2017.

Langgi dalam cherita tu dibantu pelakun bukai nyengkaum Mampi Limbi, Livonia Guing, Ruzana Ibrahim, Aidil Aziz, Johan As’ari enggau Ignas Versinkas sereta sida ti bukai.

Filem tu nyadi pengangkat bujang berani Iban ti ngembuan ulah patriotik dalam ngetanka menua lebuh masuk dalam Sarawak Rangers sebuah platun ti tebilang dalam ngetanka menua.

Pia mega, filem tu mega mantaika gaya bala soldadu di kampung ngidupka diri sereta betulung bala platun sida maya nya ti nyadi kelai bala peranak Malaysia enda ngira bansa enggau pengarap sama besukung ngelaban munsuh.

Taja filem tu kurang nerima sambut ari mensia mayuh tang penerang ti deka dituju ngagai sida endang ngeruntun ati sida ti meda.

Kelimpah ari nya, Langgi ti nadai kala ngaul diri nyadi pelakun udah seikas manah mai ‘watak’ Kanang enggau meruan dikena meri basa ngagai apai iya empu ba filem nya.

Rebak baru patut meretika filem tu ngambika sida nemu sereta ngasaika pemerani Kanang maya nya suba.