Sektor dagang temuai dibuka 17 June

KUCHING: Sektor dagang temuai, seni enggau main asal di Sarawak deka dikemendar bejalaika operasyen sida baru berengkah ari 17 June tu nitihka Standard Atur Pengawa (SOP) ke udah ditetapka Komiti Pemyangga Penusah Ngenyit Nengeri Sarawak (JPBNS).

Menteri Dagang Temuai, Seni enggau Main Asal Datuk Abdul Karim Rahman Hamzah madahka ungkup dagang temuai, sida ti dikemendar beoperasyen nyengkaum pengatur dagang temuai, rumah temuai, hotel, pengembaraan, skuba enggau snorkeling sereta taman tema (taman ba darat aja).

“Mensia mayuh meseti nitihka SOP baka nyaga takah enggau pangan diri, pemeresi diri, meresa pengangat tubuh sereta pemeresi perengkaguna mensia mayuh.

“Bala staf, temuai enggau kunteriktor meseti ngembuan aplikasyen MySejahtera enggau Covid Trace Sarawak ngambika ulih ngemuntangka pengawa nyidi kaul semak ke diguna,” ku iya.

Karim madah munyi nya ba aum pemberita bekaul enggau SOP sektor dagang temuai, seni enggau main asal nyerumba Atur Tagang Pejalai Penyuman (PKPP) di Begunan Dun Lama ditu, kemari.

Nangkan nya ku iya, operator dagang temuai ulih nerima sereta nyual booking ke udah digaga ungkup pakej dagang temuai domestik enggau pengawa ke dikemendarka perintah.

Taja pia ku Karim, pakej dagang temuai menua luar apin ulih dikemendar naka ke diatu.

“Sida ke ngatur bala temuai meseti ngelakuka pakej dagang temuai nengah makit online berindik eksibisyen enggau pengawa ngelaku ke bukai enda dikemendar nyentukka bulih pemendar ari perintah,” ku iya.

Berebak enggau nya, ungkup sektor main asal ku Karim, muzium, galeri, arkib, palan kraf jari enggau endur pengingat ulih dibuka ngagai mensia mayuh, tang temuai enda dikemendar ngena endur interaktif.

“Nembiak ke berumur baruh ari 12 taun meseti bisi orang tuai begulai enggau sida,” ku iya.

Ungkup sektir industri kreatif baka rumah produksi enggau studio ku Karim, ukih ngepunka pengawa mansutka musik, shooting, videografi, begambar, langkar grafik enggau animasyen tang nitihka SOP ke udah ditetap.

“Kompeni produksyen meseti nitihka atur lesen di baruh Akta Perbadanan Kemajuan Filem Nasional Malaysia (Akta 244) enggau Permit Penggambaran ke dipansutka Perintah Sarawak,” ku iya.

Karim mega madahka krew produksyen meseti meri rikod pejalai sida empat minggu penudi dikena mansutka lisin sereta pemendar ke patut sebedau sida ulih ngepunka operasyen kelimpah ari meseti ngerejister lalu matak MySejahtera enggau Covid Trace Sarawak.

Ba lansa ke sama, sekula muzik, kelas betanda, teater enggau studio forografi, Karim madahka nya mega dikemendar bejalaika operasyen enggau SOP ke udah ditetap.

“Nembiak tauka penyereta di baruh 18 taun meseti minta oemendar ari apai indai enggau nunjukka bukti ti diaku sebeday ngepunka sebarang aktiviti sida.

“Sida mega dilalau mai kediri instrumen tauka kereban muzik diri empu baka keyboard, biola, gitar enggau ke bukai,” ku iya nerang.