TANJUNG MANIS: Inisiatif T&T Mini Lab dipejalai Tabung Ekonomi Gagasan Anak Sarawak (TEGAS) terus dikerembai ngagai mayuh agi sekula menua pesisir dikena marit minat nembiak ba penemu digital enggau teknologi.

Ku Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh, inisiatif nya ukai semina meri peneleba tumu ngagai nembiak bekaul pengelandik jeman ke-21 tang mega ulih ngedut takah digital entara nembiak mengeri enggau menua pesisir.

Ku iya, program nya mujur diatur ba 11 sekula dalam taun 2022 enggau dikerembai ngagai 14 da sekula taun tu nyengkaum Sekula Sekondari (SMK) Belawai seraya nunjukka pengeran perintah nengeri ngemansang modal mensia Sarawak ti pintar teknologi.

“Nengah T&T Mini Lab, nembiak diberi peluang belajar chara ngatur, robotik enggau ngena dron ba pengawa belajar interaktif.

“Tu inisiatif beguna nentuka sida nyadi penengkebang teknologi lalu ukai semina penguna aja,” ku iya.

Len Talif madah munyi nya lebuh bejadi Program Roadshow Project Of Dream Realize (PRO -DR) Renggat Ke-10 di Balai IKS Tanjung Manis, ditu ensanus.

Ku iya, TEGAS ngemeratka kerejasama entara industri enggau institusyen pelajar nyadi pugu pemujur inisiatif nya kelimpah tanggungpengawa apai indai, pengajar, komuniti, gerempung ukai dikuasa perintah (NGO) enggau sektor peribit ti nyadi penyungkak ekosistem pelajar ti inklusif agi.

“Kerejasama rat ari bemacham raban tu deka nempa rebak nembiak menua pesisir ti besemekih enggau nemu kuing pemansang ba dunya teknologi,” terang iya.

Ba pengerami sebaka, iya ngemendar agih belanja penyampau RM15,000 dikena numbuhka T&T Mini Lab di SMK Belawai dikena nyukung kualiti pelajar enggau ngansah penau inovasyen ba nembiak menua pesisir.

“Aku ngelalau semua raban terus nyukung inisiatif tu ngambi mayuh agi anak Sarawak nempa pemujur nengah peluang ti dirandang kitai diatu,” ku Len Talif nyemetak.