KUCHING: Hari bulan berengkah nyeleti sekula repuk agi nganti pemutus ari Opis Menteri Wang (MOF).

Menteri Pelajar, Sains enggau Pansik Teknologi Datuk Seri Michael Manyin Jawong madahka apin lama ke udah, sida bisi berandau enggau Menteri Pelajar Malaysia, Maszlee Malik bekaul enggau pekara nya.

“Pengudah nerima gerah ari Opis Menteri Wang, baru kitai ulih ngepunka pengawa nyeleti sekula repuk.

“Pengawa nya ila deka dipenyadika Menteri Pelajar (Maszlee) empu,” ku Manyin.

Manyin madah munyi nya rambau aum pemberita pengudah bejadika Aum Entarabansa Melta 2019 Ke-28 ba sebuah hotel tebilang ditu tadi.

Nangkan nya ku iya, Sarawak udah besedia lalu rintai sekula ti begunaka bantu udah dianjung ngagai Opis Menteri Pelajar (MOE) di Kuala Lumpur.

“Aku enda ingat rintai nama sekula nya, tang seingat aku bisi 37 buah sekula, lalu kitai deka mungkal pengawa ba lima buah sekula baka ke udah ditetap.

“Tinda mega apin bisi laban bedau nerima sebarang jaku gerah ari MOF,” ku iya nerang silik.

Kelimpah ari nya ku Manyin, sida diatu mega fokus pengawa ngempuruka sekula kelebih agi sekula kurang nembiak (SKM).

“Naka diatu, semina sebuah sekula aja udah setuju lalu ke bukai madah enda.

“Kami udah nesau bala pengari rayat ba menua nya sentang pekara tu ngambika ulih mantu sida laban kitai nemu agi tubah SKM di Sarawak,” ku iya nerang.

Kebuah kitai deka ngempuruka sekula tu ngambika penyampau sekula SKM ulih dikurang sereta deka mai pemaik ngagai MOE laban ulih ngelimat belanja sida, ku Manyin nambah.