SEMATAN: Kandang tasik Sematan bisi pengulih dikemansangka nyadi palan pekit nginti (sport fishing) dikena matak bala ti rindu nginti sereta temuai ari menua tu enggau menua luar.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa nambahka tukun batu tau diperunding dikena ngaga endur bemacham spesies ikan diau, lalu nyukung pemansang aktiviti nginti ba menua nya.
“Ba sport fishing, engka kitai ulih nambahka agi tukun batu ke dijaga Sarawak Forestry Corporation (SFC) laban tu tau endur ikan diau.
“Berebak enggau nya, pengawa nambahka penyampau tukun batu udah dipejalaika di Balingian, Mukah enggau mega menua Batang Lupar,” ku iya.
Iya nyebut jaku nya ngagai pemberita pengudah bejadika Rimbun International Sematan Run 2026 ke matak lebih 1,500 penyereta di Pantai Abang Amin, ditu, Hari Minggu.
Berebak enggau nya, Datuk Patinggi Abang Zohari nyemetak madahka pemesai guna ngelala spesies ikan ba kandang tasik nya dikena mantu merambu pemansang aktiviti nginti ke beselinting.
“Enti kitai ulih ngelala spesies ikan ke bisi ba menua tu, aku ngasaika pengawa tu ulih diperambu manah agi,” terang iya.
Bekunsi kenang nginti ba kandang tasik Sematan kena Hari Enam, iya madah, gaya hari besebun enda nekul bulih empat iku ikan.
Ku iya, pemansang dagang temuai nginti bela bisi pengulih matak mayuh agi pengusung ke Sematan, lalu ngerandang peluang ekonomi ngagai peranak lokal, lebih agi operator bot, endur diau bemalam enggau aktiviti rekreasyen.
Sama datai Menteri Pemansang Indu, Ruang Bilik enggau Komuniti ke mega Kaban Parlimen Santubong, Dato Sri Nancy Shukri, Kaban Kunsil Nengeri (ADUN) Tanjong Datu Azizul Annuar Adenan, Direktor Mahawangsa Sungai Bok Plantation Sdn Bhd (MSBPSB) Tan Sri Yee Ming Seng, Direktor Urusan Rimbun Prima Sdn Bhd Bouteflika Ahmad, Menijar SFC Abang Arabi Abang Aimran, Direktor Urusan Roxy Beach Resort @ Sematan Lee Chin Teck enggau Pegawai pelilih Lundu Zulkarnain Ismail. — EDISI UKAS
