SEMATAN: Rimbun International Sematan Run 2026 dipeda ulih nyukung pemansang dagang temuai lumba enggau rekreasyen di Sematan, Lundu enggau Tanjung Datu, seriris enggau pengawa Perintah Sarawak ngerembaika pengulih ekonomi menua tebing tasik.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, menua nya bisi pengelebih ari sukut pemanah rampa tebing tasik, pematak pulau enggau ekosistem marin ke ulih dikerembai nyadi produk dagang temuai.
Ku iya, pemansang perengka guna endur diau bemalam enggau palan konvensyen ulih matak mayuh agi temuai sereta ngeranchakka pengawa meranak puku dalam industri hospitaliti, lalu ngerandang pengawa puang ngagai peranak lokal.
“Perintah endang udah ngelala Lundu enggau Sematan tu kenyau ari jeman niang Tan Sri Adenan Satem suba nyadi palan dagang temuai.
“Jalai Besai Pan Borneo ari Telok Melano nyentuk ke Kuching lalu ke utara mega ulih ngangkatka pemansang rekreasyen bepuguka dagang temuai ungkup menua Telok Melano, Sematan enggau mega Lundu, lalu ke Tasik Biru, Bau,” ku iya.
Iya nyebut jaku nya ngagai pemberita pengudah tembu bejadika Pengawa Nyua Perais Rimbun International Sematan Run 2026 di Pantai Abang Amin, ditu, Hari Minggu.
Datuk Patinggi Abang Zohari madah, pelajar enggau latih ba bidang ‘hospitaliti’ mega beguna endar dikena nempa pengereja pengawa lokal bepengelandik ke ulih nangkup peminta temuai antarabansa.
“Enti mayuh agi pengereja pengawa lokal bisi pelajar ba bidang ‘hospitaliti’, kitai ulih ngangkatka standard servis, lebih agi nangkup peminta temuai antarabansa,” terang iya.
Dulu ari nya, Premier Sarawak udah ‘flag off’ penyereta pelanda 10 kilometer (KM) pukul 6 pagi, udaH nya ‘flag off’ kategori 21KM ke dipenyadika Kaban Kunsil Nengeri (ADUN) Tanjong Datu, Azizul Annuar Adenan, pukul 4 pagi.
Kategori 5KM udah ‘flag off’ ari Menteri Pemansang Indu, Ruang Bilik enggau Komuniti ke mega Kaban Parlimen Santubong, Dato Sri Nancy Shukri, pukul 6.30 pagi.
Pengudah bejadika ‘flag off’ pelanda, Premier Sarawak bisi peluang engsikal penyauh 10KM ba menua Sematan sebedau nyua perais ngagai pemenang kategori nasional 21KM lelaki enggau indu sereta perais besai chabut tikit benasip sebuah kerita Proton e.MAS 5.
Pengawa nya bela meda Direktor Urusan Rimbun Prima Sdn. Bhd., Bouteflika Ahmad nyua replika chek ngagai Kaunsil Kampung Sarawak (SFC) enggau Unit Dialisis Hospital Lundu, ba mua Premier Sarawak.
Tuju chek nya dikena mantu pengawa ngintu enggau nyaga penyu di Sarawak, kelimpah mantu pesakit ke begunaka perubat dialisis.
Urung 2,000 penyereta ari menua tu enggau menua luar nyata ngayanka pengulih achara nya nyadi pelasar matak pengusung enggau ngelakuka Sematan nyadi palan dagang temuai. — EDISI UKAS
