SIBU: Siku lelaki bebadi nyawa lalu empat iku ti bukai bakal pengudah dua entukar dituntung penusah aksiden ba simpang Lurung Ulu Oya 8, Jalai Ulu Oya ditu, pagi tadi.
Niang dikelala enggau nama Lungan Engkang, 53, lalu sida ti bakal iya nya Nancy Angjas, 46, Chaterine Lungan, 13, enggau siku agi penumpang apin dikelala.
Bela bakal iya nya deriba sebuah agi entukar iya nya Clinton Lem, 30.
Pengari ari Bilik Operasyen Bomba Sarawak ba sebengkah penerang madah, raban sida nerima kangau telefon bekaul penusah nya urung pukul 7 pagi.
Berebak enggau nya, ku iya, Balai Bomba enggau Penyah Penusah (BBP) Sungai Merah udah ngerah 14 raban sida ti betuai ke Komander Operasyen, PBK 1 (KUP) Shairulnizam Wailie ngabas penusah nya urung tujuh kilometer penyauh ari balai.
“Penusah aksiden nya ngaul dua buah entukar bansa Proton Ixora enggau Proton Saga.
“Deriba Proton Ixora enggau tiga penumpang Proton Saga ti bakal ba penusah nya udah dianjung ngagai Sepital Sibu ngena ambulans.
“Nangkan nya, pegawai perubat ari Sepital Sibu ngenukaka deriba entukar Proton Saga bebadi nyawa ba palan penusah nya,” terang iya.
Iya madah, komander operasyen ngerah raban sida mansutka tubuh niang ngena Scoop Stretcher sereta diserah ngagai raban polis ngambi diatur pengudah nya.
Pengudah bejalaika pengawa meresi ba palan penusah nya sereta nentu ke palan nya selamat ungkup penguna jalai alun ti bukai, raban bomba mulai kediri ke balai lalu operasyen diketu pukul 8.03 pagi.
