SIBU: Siku nembiak indu sekula sekondari ditu beumur 16 taun entara 54 orang ke dikompaun ketegal ngelanggar Atur Pengawa Standard (SOP) ba sebuah bistro di Lorong Lau King Howe ditu kena malam Hari Lima tu tadi.
Sapit Ketuai Polis Pelilih Sibu Supt Collin Babat madah, semua sida nya beumur ari 16 taun nyentuk 45 taun.
“Lebuh diperesa, kami tetemuka bisi 27 lelaki enggau 27 iku indu nyengkaum pemenggi premis nya puntan nitihka SOP baka enda nitihka takah tubuh enggau pangan diri bepelasarka penyalah ‘Peraturan 10 Pencegahan dan Pengawalan Penyakit Berjangkit (PPPPB) (No.7) 2020’.
“Polis udah mansutka kompaun penyampau RM1,000 siku ngagai genap 54 iku orang nyengkaum nadai nitihka SOP maya timpuh Atur Tagang Pejalai Penyuman (PKPP) tu,” ku iya nengah sebengkah penerang, seharitu (Hari Enam).
Collin madah, polis bejalaika pengawa meresa ngagai palan nya urung pukul 10.10 malam.
