BATU NIAH: Siku nembiak indu ari Universiti Putra Malaysia Kampus Bintulu (UPMKB) ti beumur 19 taun kemari napi penanggul ampus pengudah nemuai ngagai Gua Niah.
Pengari ari Balai Bomba enggau Penyah Penusah (BBP) Batu Niah madahka, sida nerima kangau ngenyit bekaul penusah nya pukul 2.30 lemai.
Berebak enggau nya, ku iya, seraban bomba ari BBP Batu Niah ti betuai ke Komander Operasyen, PBK II Awang Azdwan Awang Sahari digerah ngelawa palan penusah nya urung enam kilometer penyauh ari balai.
Iya madah, maya datai ba palan penusah nya pukul 3.40 lemai, endang amat bisi siku nembiak indu napi penanggul ampus ngujungka iya enda ulih bejalai mulaika diri ari gua nya.
“Tudah siku ari 50 nembiak UPMKB nyengkaum siku pengelicha ti bejalai seraya belajar ngagai Gua Niah nya.
“Raban kami bela dibantu dua pegawai Ejensi Kampung Sarawak (SCF) bejalai nuju gua nya pukul 2.50 lemai sebedau datai ba palan penusah pukul 3.40 lemai.
“Tudah dibai raban bomba ngena pengusung ngagai Rumah Patrick Libau, Sungai Tangap sebedau diserah ngagai raban SFC ungkup dianjung ke Klinik Batu Niah,” ku iya ba sebengkah penerang tadi.
Pengudah nentu palan dia likun, raban bomba berengkah pulai ke balai lalu operasyen nyelamat nya diketu pukul 5.35 lemai.
