Singkang baru nuju M’sia maju

SIBU: Pemutus nginsur umur ngundi ari 21 ngagai 18 taun siti singkang baru menua tu nitihka singkang menua mansang ke bukai.

Kaban Kunsil Nengeri (Adun) Tamin Ir Christopher Gira Sambang madah, ba menua United Kingdom, peranak menua nya tau ngundi enti sida udah manggai umur 18 taun.

“Aku setujuka pemutus aum parlimen nginsur tatak umur pengundi.

“Ambika chunto di United Kingdom, perintah menua nya ngemendarka rayat beumur 18 taun ngundi lalu tu patut ditunda kitai enti deka angkat maju.

“Tebal agi sida ke manggai umur maya nya udah bisi batang kereja lalu bisi gaji, idup ti meruan sereta bisi runding nentuka kuing pengidup.

Ir Christopher Gira Sambang

“Ari nya sida baka rayat bukai bela mayar pupu ngagai perintah ti mega tau dichunto menua tu laban umur maya nya udah ulih ngidup kediri,” ku iya lebuh dirandau pemberita, tadi.

Dulu ari nya, iya ditanya sentang pemutus perintah ti nginsur umur lalu udah dikemendarka nengah aum parlimen, Hari Dua tu tadi.

Rambau Pengawa Bepilih Besai Ke-14 (PRU14) taun nyin tadi, sepenyampau 14.9 juta pengundi.

Penyampau tu dipelaba nambah 22.7 juta tauka lebih 50 peratus datai ba taun 2023.

Ku Gira, enti udah bekereja lalu gaji bisi ditulak dikena mayar pupu ngagai perintah endang tau sereta patut ngundi.

Ku iya, tikas umur nya kelimpah udah gawa, sida bela megai tanggungpengawa berat nentuka chura politik menua tu.

“Nya alai, enti udah chukup umur lalu manggai 18 taun sida bisi hak nentuka sapa bagi rayat ke patut diundi nyadi pengari rayat,” ku iya madah baru.

Penemu ke sebaka bela dibantai Menteri Muda Pelajar enggau Pansik Sains Dr Annuar Rapaee nengah laman Facebook, kemari.

Annuar madah, ba menua bukai mayuh perintah ngemendarka rayat beumur 18 taun berengkah ngundi.

Ku iya, tu enda nyengkaum di Indonesia alai rayat beumur 17 taun sama bela tau ngundi.

“Aku mega merambu deka mai pekara bekaul enggau ubah baru tu maya aum kunsil besai Parti Pesaka Bumiputera Bersatu (PBB),” pia ku iya nengah penerang nya.

Suara Sarawak