Status peranak menua jampat agi diputus nengah Komiti Khas Status Peranak Menua

KUCHING: Aum Komiti Khas Status Peranak Menua di baruh Perkara 15A Konstitusyen Perintah Besai deka betuaika dua chairman begulai berengkah ari taun tu.

Menteri Pengintu Pendiau, Pengelantang Komuniti, Orang Indu enggau Pemansang Anak Mit (KWKPK) Datuk Seri Fatimah Abdullah madah, iya begulai enggau Sapit Menteri Dalam Menua (KDN) I Datuk Seri Ismail Mohamed Said deka ngetuaika komiti khas nya.

Ku iya, aum nya diatur ngambi ulih ngemandakkan agi timpuh pemutus peminta status peranak menua ditemu.

“Komiti Khas Status Peranak Menua Perkara 15A udah ngatur aum keterubah kena Hari Dua tu tadi, udah komiti nya ditumbuhka baru.

“Lebuhka baum, kami berandau pekara bekaul enggau atur malin baru komiti khas sereta mansik lalu ngaku syor peminta peranak menua ari Sarawak.

“Ari aum nya, bala panel deka diangkat ngambi ulih dperundingka Menteri Dalam Menua laban ari sukut kuasa ba status peranak menua tu endang dipegai menteri KDN empu,” ku iya.

Fatimah madah munyi nya ba aum pemberita Ripot Ninting Bulan Mutarka Penanggul Dadah enggau Substance (MIDS) ungkup bulan March di Begunan Baitul Makmur II ditu tadi.

Suara Sarawak