KUCHING: Sarawak deka nurai siti da sejarah ba industri semikonduktor lebuh nyadi palan keterubah ba dunya ngaga storage disk ari kacha.
Premier Sarawak, Datuk Patinggi Tan Sri Abang Johari Tun Openg madah, teknologi nya ngena kacha dikena nyilih silikon ti suah dikena diatu.
“Storage Disk tu ti keterubah ba dunya deka digaga Sarawak ngena kacha, ukai ngena silikon lalu tu deka nyadi pemansang baru industri semikonduktor,” ku iya.
Abang Johari madah munyi nya ba Pengerami ‘Reunion’ enggau Pengerami Makai Lemai Pengasih Serakup Ex-Nembiak Kolej Tanjung Lobang ba siti hotel tebilang, ditu malam kemari.
Ku iya, Sarawak mega benung ngemansang teknologi chip ngena lampu lalu negapka penuduk nengeri tu nyadi hab teknologi maju.
Tambah mega, Abang Johari bisi bekunsi pasal meda robot ti ulih ngajar lebuh ngelanchar New Horizons for Western Digital (WD) Sarawak empai lama mandangka penau nengeri tu ngemudi pemansang teknologi bepelasarka semikonduktor.
Ku iya, robot nya digaga injinia anak Sarawak ti gawa di Western Digital, lalu mandangka peranak menua ulih ngasilka inovasyen betikas dunya.
“Nya kebuah, pekara ti deka disebut aku ditu iya nya ekonomi kitai chukup maju lalu kitai begunaka pengelebih nya enggau diatu dunya ngaku kitai laban pemeranak puku ninting bulan datai kitu sereta sida mega deka ngambi bagi ba ekonomi baru kitai,” terang iya.
Nya alai, iya ngarap ke alumni Kolej Tanjung Lobang ulih bekunsi pemujur ti dijapai rebak dulu begulai enggau rebak biak dikena nempa mayuh agi penau ti ulih nyungkak pemansang teknologi enggau ekonomi Sarawak dudi hari. – EDISI UKAS





