SEKUAU: Kaban Kunsil Nengeri (ADUN) Tamin, Ir. Christopher Gira Sambang nerima sukung tegut ari lebih 100 tuai rumah ba menua nya.
Penatai bala tuai rumah ari Sekuau, Selangau, Ili Oya Tajam, Siong, Lemai enggau Tamin ba Program Bejadi Komiti Pemansang enggau Pengelikun Genturung Pendiau (JKKK) Rumah Saong Dominic Daud, Tinting Pegari Sekuau nya mandang sukung tegut sida ngagai iya.
Gira ba sebengkah penerang Facebook iya madah, pemayuh tubuh bala tuai rumah ti datai nya mandang pengandal rayat ngagai agenda tranformasyen menua pesisir ti benung ranchak dipejalai di sitak nya.
“Sukung tegut bala tuai renggat baruh enggau rayat tu nyadi pugu ti beguna amat dikena kitai nyingkang jauh agi ke mua.
“Penyerakup bala tuai tu mandang peranak di DUN Tamin udah nyikap diri nyingkang seretai ba arus pemansang ti dibai perintah nengeri,” ku iya.
Ba program nya, iya bisi ngelansa pasal ubah status tanah Sekuau ari Tanah Perintah Besai nyadi Tanah Nengeri.
Iya madah, inisiatif strategik nya mujur nukang pintu ti besai agi ngagai pengawa bejalaika mayuh projek pemansang ti dibai Perintah Sarawak kelebih agi nengah Program Transformasyen Menua Pesisir (RTP).
“Sekeda ari projek besai empas ti deka dipejalai di sitak tu nyengkaum projek ngaga Jalai Ulu Oya ti beungkus RM60 juta dipelanja Opis Menteri Pemansang Genturung Pendiau enggau Kandang Menua (KKDW) lalu deka ditinda ba bulan Mei tu.
“Pia mega, rentayan Jalai Nanga Pakoh ke Rumah Ronnie ti beungkus RM200 juta dipelanja perintah nengeri enggau Jalai Sekula Primari (SK) Pakoh ke Ulu Bunau ti beungkus RM160 juta bela deka dipejalai.
“Jalai SK Pakoh ke Ulu Bunau ti dipelanja Ejensi Pemansang Bagi Menua Rajang (MiRRDA) tu disadang nyungkak sektor betanam betupi enggau logistik,” terang iya.
Gira mega bekunsi juluk besai iya ti deka nempa Sekuau nyadi palan pemansang ekonomi baru nengah perambu numbuh Mengeri Baru Sekuau ti mungkur pengawa ngaga rumah teres dikena nangkup guna peranak dia.
“Aku deka nempa Sekuau nyadi model pemansang menua pesisir ti berurun di Sarawak lalu nengah MiRRDA, kitai deka ngerumban tranformasyen infrastruktur, betanam betupi enggau logistik di sitak tu,” ku iya.
Dikena nyamin pengelantang rayat, iya bisi nyua 52 chek geran Projek Mit Pemansang Menua Pesisir (MRP) sepenyampau RM590,000.
Geran nya deka meri pemaik ngagai Gerempung Apai Indai enggau Pengajar (PIBG), rumah sembiang enggau JKKK di sitak nya.
Ba program nya, iya bela meri belanja tambah sepenyampau RM27,000 ngagai JKKK Rumah Panjai Tinting Pegari enggau bantu perengka berumah nengah Projek Nyeruri Rumah Seranta Sarawak (PPRMS) sepenyampau RM100,000.
Bela datai, Kaban Dewan Negara, Senator Rita Sarimah Patrick Insol, Pegawai Opis Pelilih Selangau, Yalin Assan, Chairman Kaunsil Pelilih Menua Pesisir Sibu, Kaunsilor Sempurai Petrus Ngelai sereta bala penghulu ari DUN Tamin.
