LAWAS: Siku lelaki Indonesia nyau deka bebadi ditagup jagu ba penusah ke nyadi urung pukul 10.40 pagi, di Ladang Kris Jati Trusan, kemari.
Ketuai Polis Pelilih Lawas DSP Roslan Leman madahka lebuh penusah nyadi, lelaki ke benama Sulu Maralang, 46 taun, benung kiruh ngait buah sawit tisi parit ladang nya.
“Lebuh kiruh numbuk buah sawit, enda mukai-mukai iya ditagup jelu ai nya ba pah kiba tang mujur ngerarika diri enggau ngachuk mata jagu nya ngena tunjuk jari iya.
Roslan Leman nambah, laban ke kesal ati lelaki nya manjung minta sah bala bakih sama gawa enda jauh ari nya lalu sida nya madahka penusah ngagai serikat ladang.
Lelaki nya bakal ba pah lalu diperubat derisa ba serikat ladang nya dulu sebedau dianjung ke Sepital Lawas.
Gambar lelaki ke ditagup jagu dikunsi sebelah meda rama kenyau ari kemari lalu bisi sekeda ngumbai jagu nya ti nagup siku lelaki Indonesia di Sungai Bilat, Miri kena 27 Oktober nyin tadi.
