KUCHING: Semua temuai menua luar enggau menua tu ti tama enggau pulai ke Sarawak deka dikeluarka Surat Gerah Bekurung (SHN) pengelama 14 hari.
Kepala Menteri Datuk Patinggi Abang Johari Tun Openg madah, gerah tu nyengkaum peranak Sarawak, pemegai pas timpuh panjai enggau timpuh pandak.
“Gerah tu diterit berengkah ari 18 March tu,” ku iya ba aum pemberita di opis iya ba Wisma Bapa Malaysia ditu kemari.
Ku Abang Johari, ejensi bekaul deka matau pengempu SHN nengah pengawa ngabas, betelefon enggau aplikasyen teknologi moden.
Terang iya, Opis Pengerai Nengeri deka ngurangka atur tu ngagai sida ti ngatur pejalai bekaul pangku pengawa khas enggau pengawa dagang.
Sama datai Sapit Kepala Menteri ti mega Chairman Komiti Penyangga Penusah Ngenyit Sarawak Datuk Amar Douglas Uggah Embas, Sapit Kepala Menteri Tan Sri James Jemut Masing, Menteri Kaunsil Kandang Menua enggau Pengawa Berumah Datuk Dr Sim Kui Hian sereta Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit Datuk Sri Fatimah Abdullah.
