KUCHING: Perintah Sarawak deka beratika baru semua sistem parit ba nengeri tu lalu nunda chara menua Belanda mutarka penusah bah.
Premier Sarawak Datuk Patinggi Tan Sri Abang Johari Tun Openg madah, pansik enggau pejalai sistem nya deka dipejalai berenggat ba menua emperan enggau suah ampuh bah.
“Kitai patut beratika baru semua sistem parit ba nengeri tu laban enti diperati, Singapore enda ampuh taja menua sida pulai enggau bisi emperan laban menua nya bisi sistem parit ti meruan.
“Nya alai aku udah minta Menteri Pengerai Mensia Mayuh, Pengawa Berumah enggau Kaunsil Kandang Menua, Datuk Seri Dr Sim Kui Hian enggau tim sida ke Belanda kin ngambi berati sistem parit menua nya lalu ngaga pansik penuh ba Sarawak,” ku iya.
Abang Johari nibarka jaku nya lebuh dirandau pemberita pengudah ngabas Palan Ngenduh (PPS) orang tasah bah ba SJK (C) Chung Hua Batu Kawa, ditu tadi.
Iya madah, sistem entali ai menua nya chukup manah taja baruh tikas ai tasik lalu enti engkeman deka dipejalai ba Sarawak.
