DITUMBUH Dewan Bandaraya Kuching Utara (DBKU) kenyau ari taun 2016, Taman Botani Sarawak diatu nyadi ikon gadung ti ngangkatka nama Kuching nyadi mengeri meruan.
Nengah pemesai lebih 200 ikar, taman semak begunan ikonik Kunsil Nengeri (DUN) Sarawak lalu nyadi palan rekreasyen, pelajar rampa menua enggau eko dagang temuai ungkup peranak mengeri tu sereta bala pengusung. Digaga nyadi palan gadung mengeri, Taman Botani Sarawak nyendia mayuh zon ti narit ati bala pengusung.
Nya nyengkaum arboretum, kebun buah, taman tema etnik, kampung paya, jalai bedarat sereta struktur landskap nyelai ti nyeremin identiti Sarawak.
Pemanah utai tumbuh ti dijaga manah ngujungka endur nya manah endur bejalai, belepa, begambar enggau nimpai pemanah rampa menua.
DISERURI MERUAN DBKU
terus nyungkak pemansang enggau nyaga taman tu nengah pengawa ngemanah enggau belabuh nyeruri perengkaguna mensia mayuh.
Inisiatif tu ukai semina ngemanah kualiti landskap mengeri tang mega nyamin pengelantang enggau gaya idup bepengerai peranak Kuching.
Kebuah pia laban Taman Botani Sarawak suah ditapat sida ti rindu ngelantang runding, sesais enggau belanda sereta mai bala nembiak bemain ba palan bemain ti bisi disedia dia.
Tambah mega, Taman Botani Sarawak tu bisi nyendia zon bebida ti meri peneleba enggau penemu bebida ngagai bala pengusung. Berindik ari nya, penatai pengusung kitu ukai semina belepa enggau belanda tang mega ulih nambah penemu bekaul utai tumbuh enggau utai idup.
NERIMA ANUGERAH
Komitmen tu mansutka asil lebuh taman nya nerima Anugerah Rosa Sinensis 2025 kena June 2025 ari Opis Landskap Menua serimbai Hari Landskap Menua 2025 ba Johor Bahru.
Nya siti pengawa ngaku profesional ngagai atur landskap ti chukup manah.
Anugerah nya mega bukti pemujur DBKU mai Taman Botani Sarawak nyadi chunto taman mensia mayuh moden enggau meruan. Kelimpah nyadi palan belepa, Taman Botani Sarawak mega nyadi palan belajar rampa menua.
Ngenang silik, mayuh koleksyen utai tumbuh menua enggau eksotik dikunsi nitih zon ngujungka nya palan ti engkeman ungkup aktiviti pelajar, pansik biodiversiti sereta program komuniti baka meri pengeleda, pemeruan enggau aktiviti manah ke pengerai.
Nya kebuah, DBKU mai semua peranak Kuching bela ngena pengelebih palan tu seraya nyaga pesaka gadung tu.
Taman Botani Sarawak ukai semina palan rekreasyen tang mega nyadi lambang identiti mengeri ti nyaga rampa menua, pesaka asal enggau pemansang dudi hari.
