KUCHING: Datuk Bandar Kuching Selatan, Dato Wee Hong Seng nerima penuemai basa ari diligit Chung Yuan Christian University (CYCU), Taoyuan, Taiwan, ti bejuraika asil tungkap Projek Langkar Tengkebang enggau Kerejasama Komuniti Taman Kenyalang.
Projek ti disukung Kaunsil Mengeri Kuching Selatan (MBKS) nya ngaul nembiak CYCU enggau Universiti Teknologi Sarawak (UTS) ti bejalaika tungkap di Taman Kenyalang, nyengkaum Taman Trafik, pasar enggau bazar, ari 1 Ogos nyentuk 5 September 2025.
Nengah perati ba endur, intebiu enggau randau begulai enggau peranak, bala nembiak nungkap endur nya, chura ngena palan mensia mayuh ari serap umur sereta peminta komuniti ba aktiviti rekreasyen enggau aura.
Bepelasarka asil tungkap nya, raban nya ngadu dua konsep langkar tengkebang ti meri perati ngagai integrasyen palan gadung enggau fasiliti mensia mayuh dikena nempа palan ti lantang enggau mayuh guna ungkup peranak.
Hong Seng mega ngelalu asil tungkap nya seraya madahka pekara nya ulih meri penemu beguna ngagai MBKS merambu projek ngaduka taman nya dudi hari.
Iya nyemetak madahka langkar tengkebang taman enda patut semina berati ke sukut rampa menua aja tang mega meseti ngira palan ngelilingi nya, demografi peranak, chura ngena palan mensia mayuh sereta peminta ngadu manah ungkup timpuh panjai.
“Tetiap taman bisi pengelebih enggau peminta komuniti kediri empu.
“Sebedau nentuka sesebengkah langkar tengkebang, kitai meseti nemu sapa ti ngеna taman nya, baka ni sida ngеna lalu fasiliti ti engkeman disedia.
“Taman ti manah ukai semina meseti dipeda manah, tang mega meseti lantang enggau muntang diakses semua,” terang iya.
Iya mega madah, pengawa nyendia palan gadung, endur duduk beperabung tauka dijaga ari panas sereta palan komuniti engkeman amat enggau gaya klimet tropika di Kuching, kelimpah ulih meransang mayuh agi peranak nyengkaum nembiak mit, ruang bilik enggau orang tua ngеna taman mensia mayuh.
MBKS deka berati ke pematut langkar tengkebang ti dilanggur ungkup Taman Kenyalang enggau ngira klimet, kereban ti engkeman dikena, timbal peranak sereta peminta ngaduka taman nya dudi hari.
Projek nya dikemudi CYCU nengah kerejasama UTS lalu diembing raban profesional ari Arkitek JFN Sdn Bhd enggau projek dipelanja Daitti Group of Companies.
Kerejasama nya nyendia penemu langkar tengkebang praktikal ngagai MBKS ngambi diperunding pengawa ngaduka taman enggau palan mensia mayuh di Kuching Selatan.
