Tamu Baru Sri Aman dibuka baru sehari tu

SIMANGGANG: Tamu Baru Sri Aman dikemendarka dibuka baru sehari tu pengudah ditutup ketegal bisi kes positif Covid-19 ba palan nya dirikodka apin lama.

Menteri Muda Pengintu Pengelantang Komuniti ti mega Adun Simanggang Datuk Francis Harden Hollis madahka sebedau tu bisi 184 iku pedagang enggau temuai ba tamu nya kala diperesa ke alai tiga iku ari sida ditemu positif Covid-19.

“Berindik ari nya, tamu tu ditutup sepengelama 10 hari berengkah 25 Februari nyentuk 5 March.

“Pengawa nutup tamu tu dipejalai dikena meresi palan tamu ari opis kandang menua,” ku iya.

Harden bejaku munyi nya lebuh ngelawa Tamu Baru Sri Aman ditu tadi.

Tandu iya, pengawa muka tamu nya tumu sehari laban udah bulih pemendar ari Opis Pengerai Malaysia (KKM).

“Notis madahka tamu tu ditutup udah ditingkilka aku empu, lalu nya nandaka tamu tu udah tau dilawa.

“Aku ngarapka semua orang dagang enggau orang ti datai kitu nitihka Atur Pengawa Standard (SOP) Covid-19 baka meresa pengangat isi enggau ngena aplikasyen MySejahtera tauka nulis nama ba buku ti udah disediaka MDSA,” ku iya.

Sama bisi datai Sekretari Kaunsil Pelilih Menua Sri Aman Tay Guan Huat, Ketuai Opis Kaunsil Kandang Menua MDSA Anthony Abell Chendan, Pemesai Opis Pengerai Menua Sri Aman Phang Soon Tien enggau ke bukai.

Suara Sarawak