Techal engkabang agi bisi digaga ba Julau

Ripih pengawa ti mayuh leman, penti pemali enggau begunaka pengepuh sereta pengeliat ati gawa entara pemar ditapi maya ngaga techal engkabang.

Niat terubah Sharina Anak Andrew Bunyin, 30 taun, semina deka bekunsika penerang enggau ripih chara ngintu buah engkabang dataika nyadi techal patut dipuji laban tebal agi rebak kemaya hari enda meretika pemar ngasilka minyak nya.

Ku Sharina, lebuh bejualka techal engkabang, mayuh orang nawar rega laban sida enda nemu pengiruh enggau pemayuh ripih pengawa dikereja dikena mansutka asil minyak engkabang ti chulin.

“Ukai deka nyalahka sida ti betawar rega, tang rega diletak nitihka pematut, setipak enggau pengelelak sereta awak ti dilimpang begagaka techal engkabang. Bepun ari pengawa ngumpul buah engkabang dataika nyadi minyak ukai pengawa ti muntang dikereja,” ku iya nerang lebuh dirandau pengarang berita apin lama ke udah.

ENGKABANG MENUA JULAU

REJEKI: Buah engkabang ti udah digumpul dulu ditugung, dikupak sebedau dijembi.

Sharina madahka menua Julau endang tebilang mansutka buah engkabang kelimpah ari buah kampung tauka asil betanam bukai baka lada, getah enggau koko. Pun engkabang tumbuh sebelah tebing ai tauka ditanam ba tanah kebun.

Peranak Rumah Mat, Batu 11 Sungai Assan Senaning tu mengkang ngemeranka pengawa di tanah baka bumai betaun enggau bekebun sereta mega pengawa ba rumah panjai ke bukai, kelimpah betupika jelu.

“Musim engkabang semampai dianti kami serumah laban timpuh engkabang bebuah chukup lama iya nya enam taun sekali. Suah mega kami serumah beduruk maya ngumpul buah engkabang. Chukup rindu maya ngereja pengawa bebala mayuh. Kaul mega rapit lalu pengawa nyadi lempung,” ku Sharina.

RIPIH NGASILKA MINYAK ENGKABANG
Ngelansa ripih pengawa ngaga minyak engkabang, ku Sharina, buah engkabang ti udah digumpul deka diempuru lalu umbang dikupak dulu sebedau dijembi dataika rangkai. Buah deka mali chura nyadi seram.

“Tau mega buah nya dipatah nyadi dua, enti bunyi semetak kelai buah udah chukup rangkai. Pengelama endur kitai nyembi nadai ditatak laban nitihka pengangat gaya hari.

NUTUK: Buah engkabang ti udah rangkai deka ditutuk dataika alus nyadi tepung.

“Pengudah buah nya chukup rangkai, buah deka ditutuk ngena lesung. Lesung dikena kami sebilik endang digaga aki aku empu benama Melayu Anak Ukau. Pengawa nutuk endang lama laban pengudah ditutuk, isi deka ditapis ngena timpa jarang dataika iya nyadi baka tepung.

“Udah semua buah tembu ditutuk datai ba pengawa manduk. Buah engkabang ti dipanduk deka digirau belama ngambika serap mansau. Timpuh bepandukka buah pengelama urung sejam setengah, sekali manduk.

“Tembu pengawa manduk baru kami belabuh ngapit. Laban pengawa ngapit engkabang agi dikereja baka kelia, dia pengapit tu digaga kami enda jauh ari ai enggau jauh ari rumah panjai.

BISI PENTI PEMALI

“Kebuah pia, kenu ku sida ke tuai, enggaika bala bukai mayuh mulut laban pengawa tu enda tau dilara nangika jelungan. Tu siti ari penti pemali ti diajar ngagai kami rebak baru,” ku Sharina.

Pengawa ngapit tu ku Sharina begunaka dua iku tubuh gawa laban pengawa tu berat lalu enggai nyadi dikereja siku aja.

ALUS: Asil buah engkabang ti udah tembu ditutuk.

“Tepung engkabang ti udah dipanduk deka ditepu dalam guni ke agi baru. Guni tu tadi dulu agi besai agi buka iya ngambika gerah endur nepu buah engkabang lalu ditungkus.

“Tungkus tepung engkabang tu tadi deka diengkah ba tengah, entara dua pengapit ti deka dirapit ngambika minyak engkabang pansut. Kayu pasak deka diengkah ba kededua piak pengapit, lalu deka dipangkung ngena tukul besi ngambika pengapit nya majakka isi engkabang padat agi.

“Upih pinang dikena nadu minyak engkabang ti pansut lalu ditimbun ngena sarang diengkah ba mua pemansut tadu tadi. Pengawa tu bisi setengah jam pengelama dataika minyak engkabang nadai nitik agi.

MANDUK: Tepung engkabang deka dipanduk dataika serap mansau lalu pansut minyak.

“Minyak engkabang ti ditimbun tadi deka dipantis ngena pemantis kupi ke alus nentuka minyak beresi lalu nadai betekang sebedau disalin ke dalam ruas. Mua ruas deka disengkabung ngena pelestik tauka kain lalu ditanchang ngena tali nilun tauka getah.

“Ruas ti ngundan minyak engkabang deka direndam ba ai chelap. Enti suba, ruas deka direndam dalam sungai lalu ditanchang ba tebing, tang diatu mar mimit nangika dikachau agas tauka utai bukai. Nya kebuah kami ngerendam dalam tung ba rumah aja,” ku Sharina nerang silik.

BISI DIJUAL CHARA ‘ONLINE’

Nikal kenang agi mit menya ku Sharina, semina nemu ngemata enggau makai aja enti disebutka techal engkabang, nyau besai diatu lalu udah belaki baru nemu ripih pengawa ngaga iya.

“Sida indai ti ngajar ngaga techal engkabang, kelimpah ke diempa diri empu, bisi mega dijual dikena nambahka belanja. Kami suah agi bejual ba makit Julau sereta mega nengah dagang online baka Facebook.

“Aku berasai lantang ulih bekunsika penerang pasal ngaga minyak engkabang, pengawa ti dikemeran sida aki ini kitai menya lalu ditampung kitai rebak dudi, kelebih agi diri empu nyau nemu ngereja pengawa tu ngatika diri.

NIMBUN: Minyak engkabang ti pansut ari lubang pengapit deka ditadu ngena upih pinang lalu ditimbun ngena sarang ti diengkah ba mua lubang.

“Juluk ati aku sigi besai, deka meda pengawa baka tu semampai dikemeran sereta idup lalu ditemu rebak dudi hari ngambika enda lenyau diseruyut jeman. Tu lanting pengawa ditinggalka peturun kitai, nya kebuah anang enggai belajar, abis nadai nemu seling ripih pengawa tu.

“Pia mega aku ngarapka raban enggau ejensi bekaul baka Opis Betanam Betupi enggau ejensi ngaul industri pemakai ba nengeri tu ulih beratika pengulih buah engkabang dijual ba makit besai agi seraya nyaup komuniti rumah panjai nyungkak ekonomi sida,” ku Sharina nyimpul jaku diri.

UDAH NYADI: Gaya minyak engkabang ti udah meku lalu ditetak nitihka peminjai dikedeka.

 

CHUKUP NYAMAI: Techal engkabang chukup nyamai dikelauk dichal enggau asi angat.