KUCHING: Revolusyen Teknologi Artificial Intelligence (AI) kemaya hari tu chakah ngubah chara idup ti ulih nambahka asil produktiviti nyengkaum industri seni enggau kraf.
Sapit Premier Sarawak, Datuk Amar Dr Sim Kui Hian madah, kebuah pia laban AI ulih ngatur pengidup sereta nambah efisiensi industri nya.
“Revolusyen tu beguna amat, ambi ke chunto, AI ba taun nyin kemari enda ulih mending utai padah kitai tang taun tu, AI ulih bejaku enggau kitai.
“Nya alai, kitai enda tekenyit enti dudi hari teknologi tu ulih dikena matau enggau meda kitai enda ngira dini endur kitai diau,” ku iya.
Dr Sim mansutka jaku nya rambau program nyain Sempekat Pemereti Ati (MoU) entara Majlis Bandaraya Kuching Selatan (MBKS) enggau Mengeri Linshu, China ba Kort Lama Kuching ditu, sehari tu.
Iya nyemetak madah, pengawa ngena teknologi nya beguna amat ba industri seni enggau kraf nyadi inisiatif dikena nambahka kualiti sereta meri pemaik ngagai komuniti kraf.
Ku iya, MoU entara MBKS enggau Mengeri Linshu, China nya ulih mantu negap kaul diplomatik entara kededua menua kelimpah ngemansang industri kraf Sarawak.
“Linshu nyadi pengeksport asil rutan pemadu besai ba dunya. Mayuh pekara ulih dipelajar Sarawak ari sida nengah rentayan sida besai enggau sistem bakul digaga ngena jari ti kemas.
“Nya alai, ungkup pengawa besilih, Sarawak ngembuan bekal asil kampung ti mayuh baka rutan, bemban enggau buluh lalu sida dipelaba bisi minat deka meli tauka bekerejasama enggau kitai.
“Kitai mega merambu nyain MoU enggau Yogyakarta, Indonesia sereta Taraz City, Kazakstan tang sayau datuk bandar sida enda ulih ngulu program tu sehari tu,” ku iya.
