KUCHING: Telaga Ai deka dikemansang nyadi palan eko-dagang temuai laban ngembuan penau besai ungkup aktiviti nginti.
Kepala Menteri Datuk Patinggi Abang Johari Tun Openg madahka palan nya nyadi sebuah palan ti chukup manah endur ngelantang ati lalu ulih nambahka penatai pemisi peranak genturung pendiau dia.
“Telaga ai deka dikemansangka enggau lebih efektif dikena narit mayuh agi bala temuai nemuai ngagai palan tu.
“Tadi aku sempat nepan bot ari tebing sungai Telaga Ai ngagai ujung Kampung Aur ke alai aku meda penau ungkup aktiviti lumba nginti amat manah,” ku iya.
Abang Johari bejaku munyi nya ba aum pemberita pengudah ngelawa sereta ninjau palan Telaga Ai ditu, kemari.
Kenu ku iya, palan nya mega ulih dikena nambahka pemanah servis Pantai Damai laban pengawa mai kapal Cruz ulih bepun di Telaga Ai ngagai Pantai Damai tauka ari Pantai Damai ngagai Telaga Ai.
“Nya alai, kitai merambu deka ngemanjaika Waterfront Telaga Ai ngambika muntang agi endur aktiviti eko-dagang temuai dipejalai ditu,” ku iya.
Tandu Abang Johari, Waterfront Telaga Ai nya deka disambung 900 meter ba sepiak kiba enggau kanan.
“Pia mega aku deka berunding enggau Kelab Bot ditu laban sida udah bisi pengkalan endur nyuwa bot laban servis tu amat beguna ngagai bala temuai ti deka nginti.
“Pekara pemansang tu deka dipasukka dalam Langgur Pemansang Malaysia Lumpar ke-12 (RMK12) ti benung diperambu diatu.
“Dalam RMK12 bisi tiga palan ba Kuching deka dikemansangka iya nya Telaga Ai, Pantai Damai enggau Lundu Sematan,” ku iya.
Iya madahka tiga palan nya nyadi rentayan endur narit temuai datai kitu meda pemanah rampa menua Mengeri Kuching.
“Tiga buah palan tu nyadi produk dagang temuai kitai laban palan nya dampih enggau Taman Negara.
“Aku ngasaika semua eko-dagang temuai tu nadai ulih ditemu ba palan bukai kelimpah Sarawak, nya kebuah kitai deka ngemanahka servis ba semua palan nya,” ku iya.
Sama bisi enggau Abang Johari ngelawa sereta ninjau palan Telaga Ai kemari Menteri Dagang Temuai, Seni, Main Asal Datuk Abdul Karim Rahman Hamzah, Menteri Muda ba Opis Kepala Menteri Pekara Islam enggau DBKU ti mega Adun Pantai Damai Datuk Dr Abdul Rahman Junaidi enggau bala bukai.
