KUCHING: Perambu numbuh pampang Palan Penyulut Teknikal Sarawak (CENTEXS) ba Teng Bukap, Padawan disadang negapka agi industri keringkam Sarawak.
Kebuah pia, ku Menteri Pelajar, Inovasyen enggau Pemansang Penau Sarawak (MEITD), Datuk Seri Roland Sagah Wee Inn, laban bala pakar ti landik ngaga keringkam endang orang Bidayuh Padawan kelebih agi ba Kampung Belimbing.
“Projek keringkam chukup tebilang nyentuk Raja Permaisuri Agong, Tunku Azizah Aminah Maimunah Iskandariah, bini Premier Sarawak, Puan Sri Datuk Amar Juma’ani Tun Tuanku Bujang sereta mayuh agi ti bukai udah nemuai ngagai Kampung Belimbing laban palan nya bisi ngaga keringkam.
“Sida mega endang pengajar kus keringkam CENTEXS ba Penjara Puncak Borneo,” ku iya.
Sagah mansutka jaku nya lebuh dirandau pemberita pengudah bejadi Forum Graduet Bidayuh: Mansang Taja Dikeruga AI ba balai mayuh guna Gerempung Nasional Dayak Bidayuh (DBNA) ditu, sehari tu.
Nya alai, iya meri jamin pengawa numbuh pampang CENTEXS ba Teng Bukap nya ulih dipejalai lengkas dikena negapka agi komuniti Bidayuh nengah pelajar pengelandik.
Iya madah, agih belanja RM5 juta udah dipinta nengah Ejensi Penyeraris Pemansang Greater Kuching (GKCDA) dikena ngemansang infrastruktur palan nya ti deka nguna begunan lama Opis Pelilih Mit Padawan.
Sagah nyemetak madah, komuniti Bidayuh meseti ulih besemekih enggau komuniti bukai nengah penemu, progresif sereta tikas semekih dikembuan sida.
