KUCHING: Bayar ungkup Bantu Khas Wang (BKK) RM500 ari Perintah Sarawak ngagai pengereja pengawa Perintah Besai nandaka perintah Sarawak endang seruran ngintu pengelantang pengereja pengawa perintah ba nengeri tu.

Chairman Pengereja Pengawa Perintah Nengeri Sarawak (CNS) Ahmad Malie madahka, CNS beterima kasih ngagai Perintah Sarawak ti betuaika Kepala Menteri Datuk Patinggi Abang Johari Tun Openg laban udah ngamatka bayar bantu khas nya.

“Bayar ngagai bantu tu dikeamatka lalu udah diterima serentak nengah bayar gaji ungkup bulan April tu tadi.

“CNS meri besai terima kasih ngagai bayar bantu tu laban tu nandaka Perintah Sarawak seruran ngintu pengelantang lalu ngenang pengereja pengawa Perintah Besai ke meri servis ngagai nengeri tu,” ku iya madah ngagai Suara Sarawak, kemari.

Nangkanka nya ku iya, tu kedua kali Perintah Sarawak udah mayar BKK ti meri penguntung ngagai lebih 110,000 iku pengereja pengawa Perintah Besai di Sarawak.

“Nya alai, CNS beratika BKK tu siti insentif sereta motivasyen ngagai sida pengereja pengawa perintah ngambika seruran bejalaika pengawa sida ngemansangka menua enggau manah agi kelebih agi ngagai rayat,” ku iya.

Apin lama ke udah, Abang Johari madahka pengawa meri BKK RM500 nya ngagai pengereja pengawa Perintah Besai di Sarawak ba sesi nyimpul Bajet Sarawak 2021 ba Aum Dun, kenaka bulan November 2020.