KUCHING: Bantu ngaga rem jalai semin ungkup OKU meri pengaga ati ngagai Methew Singka, 47 taun.

Kelimpah jalai semin, rumah iya mega nerima bantu dua agu dua khas ungkup iya enggau bini iya.

“Piak Gempung Parti Sarawak (GPS) mega mantu aku nyeruri siling rumah ke udah lama.

“Kami duai melaki bini meri besai terima kasih ngagai GPS laban udah mantu aku lalu beratika penanggul ti ditapi aku ngelama tu,” ku iya lebuh ditanya pemberita ba Kampung Kudei Baru Iban ditu seharitu.

Ku Methew, iya nyadi siku OKU kenyau 20 taun ke udah lalu ketegal eksiden.

“Aku sigi endang gawa kediri sebedau eksiden, lalu diatu aku mega gawa kediri empu.

“Kami duai melaki bini nadai bisi anak, semina beridup ungkup kami duai aja.

“Nyadi bantu ti diberi ngagai aku tu chukup manah lalu aku mega amat puas ati,” ku iya.

Rumah Methew entara 52 buah rumah bukai ti diseruri ba kandang Kampung Kudei Baru ditu dalam taun tu.

Dulu ari nya, Tuai Rumah Kampung Kudei Baru Iban, Sangi Abu madahka, sida mantu tudah Methew ketegal penimpang ti ditanggung iya.

“Sebedau tu, jalai niki ke rumah iya ngena tangga.

“Udah bisi jalai semin nyamai endur bini iya ngasurka kerusi roda tama ke rumah sida,” ku iya.