Terus titih SOP, idup chara baru

BETONG: Daya idup chara baru baka enda betabi jari enggau ngena sengkabung mua ulih ngerataka sereta nurunka lengkung graf pengerekai Covid-19.

Sapit Kepala Menteri Datuk Amar Douglas Uggah Embas madahka iya minta pengasih semua orang mantu raban ti gawa ba luan enggau perintah menua ngemeranka chara baru tu.

“Mensia mayuh patut sedar enggau nitihka gerah ti dipadahka Opis Menteri Pengerai Malaysia (KKM) enggau Komiti Penyangga Penusah Ngenyit Nengeri (JPBN) sereta ejensi bukai munaska penyakit tu.

“Rayat ti diau ba Betong mega patut mendingka lalau tu laban menua Debak udah ngerikodka 16 kes sebedau tu,” ku iya.

Uggah bejaku munyi mya lebuh bejadika Program Sepakat@Komuniti Nitih Daya Idup Baru: Mutuska Rantai Penyakit Covid-19 di Rumah Lidi Busok, Ulu Babu, Debak ditu, kemari.

Ku iya, gaya betegu tubuh enggau betabi siku mega enda dikemendarka laban gaya nya ulih ngasuh virus Covid-19 ngerekai.

“Bisi 60 peratus kes berampit di menua tu datai ari luar Sarawak nya ti ngasuh Perintah Negeri ngambi pemutus nutup pintu tama ke Sarawak baka palan penerebai bilun enggau neritka adat tama ari garis entara menua.

“Komiti Pemansang enggau Pengelikun Kampung (JKKK) patut nyadi raban penerit adat nyekat orang enda dikelala tama ngagai genturung pendiau kita enti nadai guna ti besai kelebih agi ba Pelilih Menua Kuching ti udah dikumbai Zon Mirah,” ku iya.

Ngelansa pasal pengawa ngerembaika berita bula ari orang ti enda manah ulah, iya ngelalau mensia mayuh bekunsi penerang ti betul baka ari KKM enggau Kaunsil Pengelikun Menua (MKN).

Iya mega madahka JPBN endang seruran ngeluarka penerang bekaul enggau kes Covid-19 ti nyadi di menua tu.
Berebak enggau nya Sapit Direktor Opis Pemadah Sarawak Aziz Abdul Rahman madahka program ti diaturnya entara chara sida meransang mensia mayuh nitihka chara baru ti diasuh perintah.

“Kami udah ngatur 54 kali program baka tu di selampur Sarawak.

“Aku ngarapka mensia mayuh sama beserakup nyadi raban gawa diluan ngelaban penanggul tu baka nitihka Atur Pengawa Standard (SOP), selalu masu jari, seruran ngena sengkabung mua lebuh ba palan mensia mayuh enggau seruran ningaka gerah ari KKM,” ku iya.

Sama bisi datai pengari Ketuai Polis Pelilih Menua Betong Inspektor Eddy Lani, Pemesai Pelilih Menua Betong Sohfi Jebal, Pemesai Opis Pemadah Pelilih Menua Betong Mohamad Taib Ibrahim, Temenggong Piee Alwi, Penghulu Peter George Labut enggau bala bukai.

Suara Sarawak