MIRI: Mengeri Miri deka ngenegapka penuduk diri nyadi palan ditapat budaya serantau nengah pengawa ngatur ‘The Taste of Borneo Carnival’ renggat ke-4 berengkah 1 ngagai 12 Julai tu ila.
Program nya deka matak penyereta antarabansa ari Indonesia, Brunei, Sabah lalu keterubah iya Yunnan, China bela datai ngambi bagi.
Datuk Bandar Miri ke mega Kaban Kunsil Nengeri (ADUN) Pujut Adam Yii Siew Sang madah, penatai penyereta antarabansa taun tu deka ngenegapka agi tuju program nya diatur dikena ngangkatka Miri nyadi hab besilih budaya serantau.
“Program ke sekali tu bela matak penyereta ari Yunnan, China,” ku iya madah.
Iya nerangka pekara nya ba aum media sepengudah ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi ditu, Hari Tiga.
Ba program nya ila, Miri mega deka nanggam kaul Mengeri Bebabakih enggau Kaunsil Mengeri Lijiang kena 4 Julai ti deka dikemataka Premier Sarawak empu.
Pekara nya diputus asil ari program nemuai komiti karnival ngagai Yunnan taun 2025 suba alai meda budaya enggau sejarah komuniti di Borneo bisi sama enggau etnik di Yunnan.
Kelimpah bekunsika budaya, kerejasama nya dipeda deka ngerandang awak nyungkakka sektor dagang temuai enggau pelajar dua buah menua.
Program taun tu dipadahka deka digulu 24 penyereta ari gerempung etnik ti mega ngelai pemujur pemadu nyulut kala ditempa.
Pemujur tu disadang ulih dipasuk ba ‘Malaysia Book of Records’ (MBOR). — EDISI UKAS
