KUCHING: Segerit enggau ai bisa ti dipelaba barang nadai chukai berega RM1,626,379.58 udah dirampas ba tiga operasyen bebida di mengeri tu, 25 Februari tu tadi.
Direktor Kastam Sarawak, Norizan Yahya madah, semua operasyen dipejalai raban Pegawai Kastam Begian Penerit Atur Unit Operasyen Darat Kuching.
“Operasyen keterubah ti dipejalai urung pukul 9 pagi ba sebuah kedai di Batu 9, Jalai Penrissen ti dipelaba nyadi endur nyimpan segerit enggau ai bisa nadai pemendar kastam.
“Asil operasyen, raban penerit atur mujur tetemuka 120,740 batang segerit bemacham chap enggau 6,826.27 liter ai bisa ti nadai setem chukai sereta pemendar kastam,” ku iya ba aum pemberita, ditu tadi.
