TAMIN: Tiga projek ari baruh Program Transformasyen Menua Pesisir (RTP) ungkup sitak Kunsil Nengeri (DUN) Tamin udah be-labuh dipejalai diatu ti dikeandal nyungkak agenda pemansang infrastruktur dia.

Kaban Kunsil Nengeri (ADUN) Tamin, Ir. Christopher Gira Sam-bang madah, pemansang menua pesisir patut digaga nyerangkung semua, bepun ari langgur ti diserenih nyentuk kualiti projek.

Ku iya, semua nya beguna endar nentuka tetiap agih belanja perintah meri pemaik terus ngagai pengelantang rayat.“Pengawa nyendiaka in-frastruktur pemun baka jelatung, jalai enggau endur entepan entukar ukai semina nambah pengelantang peranak tang nyukung aktiviti besehari-sehari.

“Perengkaguna tu mega dikeandal nambah rentayan penyambung enggau ngeranch-akka pemansang sosioekonomi ba kandang menua pesisir,” ku iya ba siti penerang nengah Facebook.

Gira mega madah, pengawa matau projek deka dipejalai belama nentuka tetiap projek ulih tembu nitih spesifikasi, timpuh ti ditetap enggau nangkup standard kualiti pemadu manah ke pengelantang rayat di DUN Tamin.

Tiga projek nya ngaul Ngaga Jelatung Rumah Jeram, Pasai Siong Tengah ti ditaga tembu 10 Oktober 2026, Ngadu Entepan Entukar Rumah Awin, Siong ditaga tembu 10 November 2026 sereta Ngadu Jalai ke Tadika Sungai Tepus, Balingian, Selangau ditetapka tembu 10 Oktober 2026.

Ketetiga projek nya udah nge-punka pengawa kena 11 June tu tadi nengah pejalai gawa nyerah taba begulai enggau Opis Kereja Raya (JKR) Bagi Menua Sibu, ke alai nya sebagi ari pengawa nentuka tetiap projek digaga nitih perambu, spesifikasi enggau taga ti ditetap.

Pekara nya beguna endar nentuka pemaik projek nya ulih diasai peranak menua nitih utai ti udah disemaya.

Kelimpah ari nyerah taba projek, raban nya mega udah ngatur pejalai teknikal ke taba perambu Projek Ngadu Entepan Entukar Rumah Jelian Nayor, Pasai Siong Tengah.

Tuju pejalai nya ngabas taba, ngelala pekara teknikal ti diguna sereta ngulihka penerang tumu dikena nyendiaka Bill of Quanti-ties (BQ) enggau dokumentasyen bekaul sebedau projek dipejalai.

Sama bisi ba pejalai nya, pengari JKR Bagi Menua Sibu iya nya Diana, Nur Afifah, Nurhayati Sait enggau Rashidah. Bela datai ngari ke Palan Servis ADUN Tamin iya nya Kaunsilor Nyireng Saleh enggau Kaunsilor Ajan Dau.