SIBU: Universiti Teknologi Sarawak (UTS) nempa pemujur ngemegah nengah tikas pengelaku graduet ngelui 96 peratus, ku Mandal Chanselor UTS, Profesor Datuk Dr. Khairuddin Abdul Hamid.
Penerang nya dikunsi iya lebuh bejaku ba Pengerami Makai Lemai Konvokesyen Ke-9 UTS ti diatur di Dewan Canselor Tun Abdul Taib Mahmud, ditu ensanus.
Ku Dr. Khairuddin, data pemadu baru ari Opis Menteri Pelajar Tinggi nunjukka penyulut besai seraya ngenukuka lebih 96 peratus graduet UTS mujur kereja pengudah abis belajar.
Nya kebuah, iya meri tabi puji ngagai semua graduet ke pemujur tu.
“Aku deka madah ke lebih 96 peratus graduet kami diatu udah mujur bulih kereja pengudah abis belajar.
“Tu pemujur ti ngemegah ati lalu ngena peluang tu, meri tabi puji ngagai semua graduet UTS,” ku Dr. Khairuddin.
Pia mega, iya meri terima kasih ngagai bakih industri ti udah meri sukung rat ngagai universiti.
Dr. Khairuddin nyemetak madah ke pemujur UTS ukai semina disukat ari sukut akademik tang mega nengah pengawa diaku sektor industri.
“Enti nadai sukung rat ari bakih industri kelebih agi di Sibu, kami engka enda ulih nyapai pemujur tu.
“UTS chukup temegah ngembuan kaul rat enggau mayuh tuai industri ti semampai meri malin enggau sukung nentuka penyulut kami,” ku iya agi.
