ARTIKEL

Tim Gerempung Tuai Rumah champion berekat semangat enda mudah alah

Facebook
Twitter
LinkedIn
WhatsApp
Telegram

TIM Gerempung Tuai Rumah (GTR) N36 Layar ti keterubah iya masuk Safari Rakit Balleh-Kapit udah nurai sejarah ngempu gelar champion pengudah mujur ngalahka 22 tim bukai.

GTR N36 Layar ti ngena lumur plat 119 mujur datai ba adan enggau rikod pemadu deras iya nya empat jam, 23 minit enggau semilan sikin.

Nyata dipeda tim diulu ke Pegawai Opis Pelilih Betong, Alfred Geling Ason enggau penyanding penemu tim, Christina Peter nya endang jaguh.

Tambah mega, tim betuai ke enam perakit (empat raban simpan) bepekit enggau nama ti chukup dikelala semak Katibas enggau Song.

Nya kebuah ku Alfred, gelar champion Safari Rakit Balleh-Kapit Edisi Ke-26 (2023) ti keterubah diatur ba Pelilih Song nya endang pemujur ti enda disangka.

Nyadi menijar tim nya, iya ngasaika utai ke nyadi tu endang enda disadang.

KERING SEMANGAT

“Uji kita berunding, keterubah masuk pekit berakit besai, nadai belatih… baka ni rakit enggau pejalai pekit pen kami enda nemu.

“Tang semangat dikembuan semua tim GTR N36 Layar chukup kering. Engka sida ninga bisi tim ngelemi ke kami.

“Baka jaku sekeda ti madah, enti kita enda nemu jalai lagi nitih ke kami aya.

“Taja semua diau diri, tang aku madah ngagai sida anang kiruh ke jaku nya.

“Pengudah pengawa belumba dilepas (nyadi tim ke-19 dilepas), aku ngasai bisi semangat Panglima Rentap bisi enggau kami.

“Ba sepanjai Sungai Tekalit, sida ulih ngalahka empat tim lalu ba Nanga Sungai Tekalit, lima agi tim digelih.

“Nyentuk datai ba Sungai Katibas, kami udah ba penuduk ketiga,” ku iya.

Ku iya ke mega ngulu pekit berakit nya, kaban ti dalam perau pengiring enda ngetu meri jaku peransang.

“Kitai ngena chara ‘scam’, manjung nyebut bisi tim bukai bedau ulih digelih ngujungka kayuh sida majak laju.

“Tang meh chara nya ditemu siku ari raban kami ti malik ke belakang lalu meda nadai agi rakit bukai, semina bot komiti ngenyit aja bisi ngiring kami.

“Tang aku meda semangat sida enda kala padam manjung nyebut Betong Mansang Maju.

“Nyentuk pansut ari Sungai Katibas enggau nuju Sungai Rajang (adan), nemu nya rakit belumur plat 105, Nabau Beratung Ulu Takan enggau plat 106, Kaunsil Pelilih Kapit udah datai.

“Taja pia, pemutus ditentu nengah rikod pemadu jampat lalu kami dikenuku ngempu gelar champion.

“Ditangkan Nabau Beratung Ulu Takan ti ngerikod empat jam, 34 minit, 48 sikin bulih lumur dua lalu Kaunsil Pelilih Kapit bulih lumur tiga enggau rikod empat jam, 35 minit enggau 48 sikin,” terang iya silik.

ENDA MUDAH ALAH

Nangkan nya ku Christina, iya beempu tanggungpengawa nyaga pengelantang semua.

“Aku meseti nentuka sida chukup tinduk, beleak enggau chukup makai tang maya hari nyadi, sida bepekit nadai nyepi Seleka asi tauka pemakai bukai ngambi kering tulang.

“Nitihka penerang, bisi sekeda enda jenak tinduk ketegal ninga munyi inggar tang pukul 4.30 pagi sida udah besikap.

“Lalu Tuai Rumah Rozana enggau Tuai Rumah Rokayah ti ngambi ai kopi kemari lalu diangat baru ngambi diirup enggau kuih.

“Aku mega bisi mai ke sida kuie ngambi bisi diempa ba atas rakit tang mayuh sida madah enda sempat makai laban bisi misyen besai deka menang,” terang Christina.

Ditanya baka ni ulih masuk Pekit Safari Rakit Balleh-Kapit, iya madahka nya perambu Kaban Kunsil Nengeri (ADUN) Layar, Datuk Gerald Rentap Jabu ngambi bisi pegawai ba Opis Pelilih Betong meda chara ngatur enggau budaya komuniti.

“Keterubah aku nulak berindik ari mayuh program bukai benung enggau deka diatur.

“Tang pengujung iya aku setuju laban Pegawai Opis Pelilih Betong pen setuju.

“Pengudah bulih pemendar ari Residen Bagi Menua Betong, kami pen kiruh ngatur pekara ti patut dikereja.

“Aku ngaku mayuh pemar tang pemujur raban nyadi ‘penabar’ lalu ngena peluang tu, meri tabi puji ngagai semua.

“Mayuh pekara dipelajar aku, ti manah enggau jai… bisi magang. Tang semua tu nyadika teladan ungkup dudi hari.

“Ni nemu dudi hari Betong deka ngatur aktiviti baka tu,” terang iya baru.

PERAIS KAMI… Alfred Geling enggau Christina Peter (kanan) nunjukka perais dipenggi sida.

BERITA LAIN

BERITA TERBARU