Tim Kuching City FC belatih ba enam bagi menua seraya ngiga pemain baru

ENAM bagi menua udah dipilih Tim Kuching City FC neruska program pejalai sida ba bulan Disember tu ila.

Entara bagi menua tu iya nya Sri Aman, Sarikei, Sibu, Mukah, Bintulu enggau Miri.

Ketuai Pegawai Eksekutif (CEO) Kuching City FC, Iswandi Ali Hassan madah, sida udah baum enggau bala exco apin lama ke udah lalu ngaga pemutus milih enam bagi menua nya.

Kenu ku Iswandi, sida deka bepun bemain ba Sri Aman (8 Disember), Sarikei (10 Disember), Sibu (12 Disember), Mukah (15 Disember), Bintuku (18 Disember) enggau Miri (21 Disember).

“Bala pemain deka terus belatih kelimpah bemain nyatup tim ke dipilih ba genap bagi menua ke dilawa nya,” ku tandu Iswandi madah ngagai pemberita.

CAPTION: – KAMI KITU…Iswandi Ali Hassan mandangka rintai bagi menua deka dilawa tim Kuching City ba bulan Disember tu.

Iya mega madah, pejalai serak tu deka ngena nama baru (Kuching City FC) seraya ngelakuka nama tim baru tu begulai enggau dua iku pemain import ari Jipun, Yuta Suzuki enggau Yuki Tanigawa.

“Dua pemain import ari Brazil (Bryan Jones Anicezio & Hudson Dias De Jesus) udah pulai ngagai menua sal seduai iya lalu ngintu Krimas.

“Semina Yuta Suzuki enggau Yuki Tanigawa aja enggau kami bejalai ngagai enam bagi menua tu,” ku Iswandi.

Nangkan nya, Iswandi mega ngarapka asil ari program pejalai nya sida deka tetemuka pemain baru dalam timpuh dua minggu nya.

“Kitai pechaya deka bisi pemain baru dikelala ga genap main ke diatur ila.

“Ari nya sida deka dipasuk bemain enggau tiga tim besai (Kuching City FC, Piala Presiden Kuching City & Piala Belia Kuching City),” ku iya.

Bala pemain Kuching City FC deka bepun belatih kena 2 Disember tu ila pengudah diberi kemisi seminggu.

 

Suara Sarawak