KUCHING: Sarawak Skills enggau ICATS UC deka numbuhka Palan Penyulut Teknologi Rentayan Bekal Hidrogen taun 2024.
Pengawa nya nipakka Strategi Pemansang udah COVID-19 (PCDS) 2030 enggau nyukung menua ngurangka karbon.
Dikena ngemuntangka pengawa mindah teknologi baru bekaul, diligit Sarawak Skills enggau ICATS UC udah nemuai ngagai empat organisasyen ba Republik Rakyat China.
Sida napatka Foshan Feichi Motor Technology Co. Ltd, Politeknik Foshan, Indu Opis Sino-Synergy ba Foshan enggau Teknologi Guangdong Sageran ba Guangzhou berengkah ari 25 ngagai 29 November tu tadi.
Direktor Eksekutif Sarawak Skills, Hallman Sabri madah, nya siti pemujur beguna endar dijapai raban sida enggau ICATS UC begulai enggau bakih strategik ba China.
Ku iya, nya deka meri pemansang ngagai Sarawak enggau Malaysia mega.
“Ba pekara tu, Sarawak Skills enggau ICATS UC deka nganjung siti tim pengajar enggau pengelicha ngagai organisasyen nya ngambi sama ngemansangka program latih bekaul hidrogen.
“Tim nya mega deka bejalaika tungkap enggau pemansang ba pekara bekaul nitih ke pekara udah dipaum,” ku iya nengah sebengkah penerang empai lama.
Hallman madah baru, seraban pakar ari Politeknik Foshan mega deka datai ke Sarawak Skills Kuching ngambi mantu pengawa numbuhka Palan Penyulut Teknologi Rentayan Bekal Hidrogen nya. – Edisi UKAS.
