BAU: Penyadi penusah bah ba Krokong diatu diripotka agi ulih dipatau enggau tikas ai majak surut, tang mensia mayuh dipinta terus bejaga berindik ari gaya hari enda tentu ba sekeda endur ngelingi Kuching.
Sapit Premier Sarawak ti mega Chairman Komiti Penyangga Penusah Nengeri Sarawak (SDMC), Datuk Amar Douglas Uggah Embas madah munyi nya pengudah ngatur pejalai ngabas dua Palan Pengenduh (PPS) iya nya PPS Kampung Bijuray Mongag enggau PPS Kampung Blimbin, ditu kemari.
Ku iya, naka kemari, bisi 172 raban tasah bah ba kededua PPS nya seraya gaya hari ba Krokong majak manah.
“Taja tikas ai nurun enggau Krokong agi ulih dipatau tang endur bukai agi ba tikas bejaga.
“Nya alai, mensia mayuh dilalau terus nitih ke atur raban bekuasa lalu sedia napi sebarang penusah enda disadang nyadi,” ku iya.
Iya mega nyemetak madah ke pemesai guna besikap tumu napi ubah gaya hari nyengkaum risiko ai niki ba timpuh pandak.
Nambah ke nya, Uggah meri terima kasih ngagai Komiti Pemansang enggau Pengelikun Genturung Pendiau (JKKK) ba endur nya ti udah ngesan pangku pengawa enggau numbuh raban mutar penusah ngenyit.
Tu dikena nyaup ngatur tumu raban tasah bah nyengkaum nyendia pemakai enggau barang diguna seraya nganti bantu bukai ari raban bekuasa.
Bela nyempulang Uggah iya nya Residen Bagi Menua Kuching, Dayang Joanita Azizah Abang Morshidi, Pegawai Pelilih Bau, Eddy Nayoi, Tuai Polis Pelilih Bau Superintendan Mohd Haide A. Rahman sereta Pegawai Raban Penyaga Orang Periman Malaysia (APAM) Pelilih Bau, Nurul Hikmah Abusamah.
