Trajedi 20 Jan 1971 : Ditegah komunis di Tanjong Batu Babi, Katibas

Kena 20 Januari tu tadi dia alai bala anak Sarawak ti ada kena 20 Januari 1971 diatu nyau udah manggai umur 50.
Reti nya, bala sida nya diatu nyau manggai ba setengah umur. Kebendar kena 20 Januari 1971 bisi siti sejarah ke besai reti bekaul enggau pengelikun enggau pemaik di menua kitai di Sarawak.
Nitihka penerang Presiden Gerempung Veteran Soldadu Kor Renjer Lt Kol (B) Mohd Melintang Abdullah, 63 madah lebuh maya tu meh keterubah iya bala komunis nyerang bala soldadu ngena jalai tegah tauka ‘ambush’ ba sungai di Sarawak.
Pengawa ti baka tu endang siti ari jalai bala komunis ngelaban bala soldadu ti mayuh betengahka jalai sungai lebuh maya nya menya, ku Melintang.
Tegah bansa tu ulih ngalahka soldadu enggau nyamai agi laban sida ti ditegah nya benung nepan perau sereta pedis deka malas enti ditimbak.

Pegawai Waran II Lenggu Anak China.

Kena 20 Januari 1971 lebuh dua buah perau soldadu betubuh 13 iku ari Markas Tek di Nangah Engkuah benung mudik mulaika diri ari Nanga Bangkit dia alai perau sida ditegah munsuh ba urung menua ti dikumbai sida Tanjung Batu Babi di Batang Katibas.
Sida baru pulai bepadah nesau bala Tuai Rumah ngasuh sida datai nguang ngagai siti pengawa randau di Nanga Engkuah kena 21 Januari 1971.
Lt Kol (B) Anwar Basha Khan siku ari raban soldadu menua kitai ti kena tegah komunis maya nya, diatu agi meruan gerai lalu bisi nusui pengingat diri.
“Lebuh kami mansa tanjung nya dia alai perau ti ditepan aku lalu diperejin bala komunis ti endang lama udah ngipa deka negah kami ba tebing kanan mudik Sungai Katibas.
“Peluru ti nyelinting kami nyau baka leka ujan. Orang ti jaga luan perau aku kena timbak lalu mutus seput tekala nya sereta terus labuh ke ai Katibas ti benung besai sereta deras” ku Anwar nguji mulaika pengingat iya lebuh maya ti kena tegah komunis maya nya.
PENGINGAT…Lt Kol (B) Anwar Basha Khan (tengah) nerima tepa ari Datuk Stephen Mundaw seraya dikemataka Lt Kol (B) Mohd Melintang Abdullah (kiba) rambau penemuai ngabas Bujang Berani taun nyin kemari. -Gambar Album

Anwar enggau bala iya sama malas nimbak munsuh ti ngujungka Anwar kena ba pala sereta enda ulih betimbak agi laban jari iya nyau enda ulih ngachitka senapang diri ketegal kerubung pala iya udah kebus kena leka peluru.
Udah nya, iya lalu nguji ngerayap ke belakang perau ngagai alai injin tang injin nyau udah jai laban kena timbak komunis lalu ngujungka perau sida anyut.
Dua iku ari bala iya ti sama nepan perau bela terejun muai diri ke ai Katibas. Siku ari soldadu ti sama ba luan iya nya Sarjan Midung anak Gunde sama mega nyaup malas nimbak bala komunis ti ngujungka lengan kanan iya anchur sereta pechah kena laban peluru.
Kelimpah ari lengan dia alai patung iya mega kena timbak komunis ti ngujungka kaki kiba Sarjan Midung agi meruan pedis nyentukka sehari tu.
“Aku sigi nadai nemu diri idup laban perau kami endang udah ba tengah-tengah ai lalu nyamai alai komunis nimbak kami” ku tusui Sarjan Midong Anak Gunde iya nya siku Bujang Berani menua ari Kampung Serasot Bau.
Enggau ati ti berani sereta keran deka ngalahka munsuh dia alai perau ti entudi ti betuaika Pegawai Waran II, Lenggu Anak China lalu ngelih perau sida Anwar lalu nguji ngansak ke tebing alai munsuh sereta terus nachahka bala munsuh ari mua masuk ngagai “killing area”.
Tu meh maya bala komunis nyamai ngiching lalu nimbak sida ti ngujung ka semua sida enam iku dalam perau nya kena sereta mati magang.
Perau sida lalu ngelantak tebing ba mua munsuh ti ngaduka tegah. Tudah Lenggu maya nya agi bisi seput lebuh ti ditabankan ngagai Nanga Engkuah tang empai lama udah nya iya ngapuska seput diri.
Anwar enggau Midong udah nya lalu ditaban ngena bilun engkabang malam nya ngagai sepital di Sibu.
Midong diperubat ba sepital pengelama 28 hari lalu tudah Anwar nadai nemu orang dalam pengelama empat hari lalu diperubat ba sepital kira dua bulan.
Laban ti udah kena leka peluru ba pala, ngujungka Anwar mati tubuh sepiak.
Puji Tuhan, pemuas ke diperubat dia Anwar ulih gerai tang enda ulih enggau ngiga munsuh dalam babas agi laban iya diberi status ‘Base Everywhere’ tauka BE.
Anwar enggau Midong bela bisi nandu pengingat seduai tu lalu penerang ke lebih silik deka dibantai sereta dichelak dalam bup ke dikarang dua iku pengelicha enggau pemansik ari Universiti Malaysia Sarawak (Unimas) iya nya Profesor Madya Dr Neilson Ilan Mersat enggau Dr Regina Garai.
Pemerani bala sedadu ti belaban enggau bala komunis lebuh kena tegah di Tanjung Batu Babi endang balat dipuji ngujungka bala soldadu majak tampak nama jelai rita.
Melintang muji pemerani sida tu lalu madah sida tu sigi amai-amai bepegai ba jaku peransang renjer “Agi Idup Agi Ngelaban”.
Pemerani sida tu patut nyadika chuan enggau teladan bala nembiak rebak baru. Tu mega mandangka pemesai budi bala renjer ti sanggup berambunka nyawa dikena ngetankan pengelikun menua kitai.
Ba reti ti besai agi pemaik ti disepi kitai diatu endang datai ari pemerinsa enggau pemedis ti diasaika bala soldadu ti udah berambunka nyawa sida.
Dalam tegah ba Tanjung Batu Babi di ai Katibas nya dia alai bisi enam iku bala soldadu menua tu bebadi nyawa lalu bala komunis ke mega diripotka bebadi nyawa bisi empat iku.
Dua iku ari Bujang Berani ti sama bisi sama ampit betachah lebuh ditegah nya endang seruran ingatka Tanjung Batu Babi lalu besai endar pengarap pengawa sida nya tetap dikenang tauka ditemu semua rayat di menua tu.
Berebak enggau nya, kenu ku Dr Regina, utai ti nyadi ba Tanjung Batu Babi nya endang mandangka pemerani bala soldadu kitai lebuh ngetanka menua ketegal ngaduka pemaikka bala kitai mayuh.
“Semua sida ti enggau betachah sama ensepi pemedis lebuh kena tegah komunis maya nya sigi tau digela bala Bujang Berani magang.”
“Taja pan diatu sekeda ari kitai enda ingatka utai ti nyadi maya tu tauka enda ngelala sida tang sida tu meh orang ti patut dipuji laban udah bebendar ngetanka menua kitai ari langgar munsuh.
“Endang patut kitai ngingatka sida tu laban sida tu udah nyadi Bujang Berani ba tegah Tanjung Batu Babi”.
Kelimpah ari Pegawai Waran Lenggu Anak China ti bulih midul Bintang Sri Pahlawan ketegal ari pemerani iya lebuh betachah ba endur nya, bala bukai mega ti enggau betimbak lebuh kena tegah di Tanjung Batu Babi sama patut digelar kitai Bujang Berani magang.
Laban sida tu meh engkeman beempu ensumbar ‘Orang Ti Maing Muting Geraji Tajam Gerenyam Nyemilu Tisi. Setempap Enda Rarat, Setumbit Enda Nginsit Lalu Sekaki Sigi Enda Rari.’

Suara Sarawak