OYA: Tubuh siku lelaki ti dipelaba lenyau di Nanga Batang Oya kenyau ari ensanus mujur ditemu pagi kemari. Tubuh niang, Awang Ismail Awang Rosidi, 28, ditemu urung pukul 8.50 pagi ba penyauh urung 800 meter ari pantai Oya.
Tuai Balai Bomba enggau Penyah Penusah (BBP) Mukah, Penulung Penguasa Bomba Nicholas Belulin madah, raban sida bisi nerima penerang bekaul pengawa tetemu ke tubuh niang.
Iya madah, pengudah nerima penerang nya, seraban bomba digerah napatka endur tubuh tudah ditemu.
“Peranak dia ti bela ngambi bagi ba operasyen ngiga enggau nyelamat (SAR) ngiga kenyau ari ensanus tetemu ke tubuh tudah pagi kemari
“Nya alai, operasyen SAR diketu pukul 9.40 pagi,” ku iya ba sebengkah penerang kemari. Iya madah, raban bomba mantu ngangkat tubuh tudah sebedau diserah ngagai raban polis ungkup atur bukai.
“Udah nya, tubuh tudah dibai ngagai Sepital Mukah,” ku iya. Dulu ari nya, pagi ensanus, tudah diripot lenyau pengudah dipechaya labuh ari perau ba Nanga Batang Oya.
Penusah nya nyadi enda jauh ari siti kilang obor-obor di endur nya sebedau bini tudah ngaga ripot polis lalu raban bomba, polis enggau peranak dia bejalaika operasyen SAR.
