TANJUNG MANIS: Tubuh siku lelaki nyelai pendiau (OKU) ti dikenuku lenyau ba genturung parit ba Kampung Jerijeh kemari mujur ditemu pukul 7.50 pagi tadi.
Pegawai Penyaga Orang Periman Malaysia (APM) Pelilih Tanjung Manis, Lt. (PA) Md, Azan Sadie madah, tubuh lelaki ti beumur 31 taun nya mujur ditemu mensia mayuh.
“Pukul 7 pagi, mensia mayuh ngiga tubuh tudah nengah pengawa masang pukat ba sepanjai parit iya nya ba palan kepenudi niang dipeda.
“Maya masang pukat, mensia mayuh tetemuka lelaki nya udah midang, melepung enggau tesangkut ba dan nipah,” ku iya ba sebengkah penerang tadi.
Terang iya, raban polis enggau mensia mayuh ngangkatka tubuh niang sebedau dibai ngagai Masjid Kampung Jerijeh.
Dulu agi ari nya, niang diripotka lenyau pengudah nurun nginti ba genturung parit urung 500 meter penyauh ari rumah iya empu.
Kepenudi niang dipeda ngena baju bechura mirah.
