TUSUN DUA

BAKA udah disemaya, ba Tusun Dua tu kitai deka ngenang siku ari nembiak ti mujur nempa nama rambau Pekit Pengelandik Jari 2025-2026 diatur Iban Women Charitable Trust (IWCT).

Iya nyadi pemekit pemadu biak ba pekit nya lalu bulih lumur tiga ba Kategori Nenun Kain Karap sereta pulai mai perais mata duit RM1,000 enggau setipikit.

RINDU ARI MIT

Pengerindu ke pengawa betenun tumbuh maya umur tujuh taun, Marcell Milan Manggie anak Matthew berengkah nguji betenun maya umur manggai 17 taun lalu pengawa nya mengkang dikereja iya nyentuk diatu.

Anak tuai ari tiga diri menyadi nya madah, orang ti nyadi ke pun enggau perangsang betenun iya nya niang ini tuai sida ti benama Bidah anak Dulah.

“Kelimpah ari niang ini, tapak aki aku empu, iya nya Sandine Bennidect anak Ikang, siku penenun ti udah nempa nama ba pengawa asal kitai di Tanah Kenyalang, udah narit ati aku rindu ke pengawa betenun.

“Aki Sandine mega mih orang ti ngajar aku betenun lalu tau dikumbai guro aku ngaul diri ba pengawa asal kitai Iban tu,” ku iya ngepunka randau.

Mulaika kenang lebuh agi mit kelia, iya ti teleba dikangau Manggie madah, terubah labuh pengerindu ba pengawa betenun karap iya nya ari meda sida ini betenun.

“Terubah aku labuh pengerindu ba pengawa betenun karap tu iya nya ari meda sida ini betenun, maya ke nunga sida ngereja pengawa nya di ruai tauka di lawang besai.

“Rindu ga ati meda pengelanchat jari sida nenun ubung.

Taja pia, aku nadai mayuh mulut.

Aku semina diau jenuh sambil berati ke aja.

“Nyau ke lama-lama pemuas ke meda, nyau bisi pengerindu tudah aku ari meda aja pengawa sida niang ini betenun,” tusui iya mulaika pengingat diri agi mit kelia.

NGUJI BETENUN

Igat Manggie ti baru beumur 20 taun madah, terubah betenun ngaga kain suba, iya dulu agi nguji ngaga utai ke mit-mit dikena matih jari baka selampai.

Udah ngasai ke jari diri nyau landik enggau lanchat agi, nya baru iya ngemeranika diri nenun lambar kain.

“Terubah aku betenun ngaga kain suba, laban sebedau nya aku ngaga utai ke mit-mit dulu dikena matih jari baka selampai, udah nya ku baru berani nenun kain.

“Lalu kain ke terubah ditenun aku iya nya kain karap menarang penama Buah “Pating seribu tumbuh di andau tinting kelang, pating kelindang tumbuh di tisi bukit kelingkang”.

“Ati chukup gaga sereta ransing maya nya laban ulih ngaga kain nya laban buah nya diangkatka aku baru ari buah kain lama sida ini kelia,” ku iya enggau tuchum gaga.

Ngenang asal penatai diri, Manggie madah ke apai iya asal ari menua Sungai Teban Labang, Batang Kemena di Sebauh seraya indai iya orang Tanjung Manis, Sarikei.

“Indai kami nguai ke apai di Batang Kemena lalu diau nyemilik ini tuai kami, niang Bidah, ti nyadi peransang aku rindu enggau angkunka pengawa betenun tu.

“Lalu aku endang ada sereta mansang besai di Batang Kemena, Sebauh sebedau tama sekula primari di mengeri Bintulu laban nitihka periuk asi sida apai.

“Aku belajar Primari Satu ngagai Primari Empat ba Sekula Primari (SK) Kidurong Dua seraya Primari Lima enggau Primari Enam aku belajar ba SK Kampung Baru Bintulu.

“Udah nya, aku nampung sekula sekondari ba Sekula Sekondari (SMK) Baru Bintulu nyentuk abis Pom Lima.

“Lalu diatu, aku benung nampung pelajar ba Kampus Satelit, Institut Kraf Negara (IKN) Sarawak di Betong belajar ngambi Setipikit Pengelandik Malasyia (SKM) Tikas Tiga Tenun Pua,” ku iya ngelansa penerang diri.

MANDANG PENGAYA

Nampung baru randau, Manggie madah, kain karap tu ba budaya tauka pengeraja tekstil tu enti kelia chukup besai reti sereta berega.

Ku iya, sema kain karap dikembuan orang nya bebuah ke ubung emas tauka ubung pirak, orang nya sigi ditemu orang bereta enggau kaya raja sereta pemisi.

Kebuah pia laban ubung emas enggau ubung pirak enti kelia sigi chukup mar rega dibeli ketegal ubung nya endang digaga tulin ari emas enggau pirak.

“Kain karap tu chukup besai reti ba budaya enggau pengeraja tekstil kitai Iban baka pesaka asal bansa kitai ke bukai.

“Enti kelia, enti ba bilik penaik orang nya ngembuan kain karap ditenun ari ubung emas enggau ubung pirak, iya dikumbai orang pemisi enggau bereta sereta bilik orang kaya raja.

“Nambahka nya, penuduk orang nya mega chukup dibasa kelebih agi sida serumah nyentuk sekayu ai ba menua nya.

“Laban maya nya ubung emas enggau ubung pirak tu sigi digaga ari emas enggau pirak tulin, ukai chelup baka jeman diatu.

“Nya ti ngasuh iya chukup mar rega sereta chukup berega ari sukut duit ringgit kelia,” ku iya.

Tambah mega ku Manggie, kain karap tu kelia chukup berega laban kain nya ukai semina tekstil ti deka dikena aja.

Tang ku iya, kain karap nya nyadi lambang pesaka, identiti, mandangka pengelandik jari, kreativiti enggau gaya budaya Iban sereta nilai ke meseti dijaga.

Iya mega madahka orang ti ngaga tauka nenun kain karap tu digelar Indu karap indu kebat, indu anyam indu sidan.

KEREBAN ASAL

Nyau panjai agi randau, jang Manggie madah, bisi mayuh bansa enggau penama kereban dikena betenunka kain karap tu nitihka gaya guna ba ripih pengawa betenun.

Iya madah, suah agi kereban tu endang kereban asal tauka kereban lama ti dikembuan orang kelia sereta bisi mega dibeli ari bala ti ngaga enggau bejualka kereban nya.

“Entara kereban nya baka lidi pakan, leletan, lebungan, lidi karap, tendai, rakup, belia, ripang, jengkuan, sengkabit enggau suri.

“Lalu kereban ti suah dikena ngentun kain karap dikumbai kitai belia ngambi ubung rapit sereta padat.

“Kelimpah ari nya, kereban bukai dikena maya betenun baka belia indu, belia anak, ripang ubung enggau lebungan.

“Seraya ubung suah dikena aku iya nya ubung taya enggau ubung polister laban dua bansa ubung tu teguh lalu ripih pengawa nyendiaka ubung sebedau ditenun dikumbai nabu ubung,” terang iya.

Nerang silik agi, Manggie madahka motif tauka buah pua suah diangkat orang nitih tingkat pengelandik betenun laban enda tau sengapa ngangkatka siti-siti buah kain.

Kebuah pia laban, enti orang nya enda tuai bulu ngangkatka pua ti tinggi pangkat enggau tinggi nama baka Pua Jugam, dia orang nya tau alah ayu ngujungka sakit sereta tau mega lesi.

“Buah pua lama suah diangkat orang baru baka Buah Lelambak, Pemuchuk Tubu, Mata Puna, Lingkuk Wi, Randau Engkelait, Siku Enseluai enggau mayuh agi.

“Pengalus enggau pemanah pua tu udah nyadi endang bepanggai ba pengelandik jari orang ke nenun maya nganyam ubung dikena ngasilka buah dikedeka ati,” ku iya.

RIPIH PENGAWA NENUN

Nyau ngenang ripih pengawa keterubah maya kitai ngepunka pengawa betenun kain karap iya nya ngirit ubung, ku jang Manggie.

Kebuah ngirit ubung tu nyadika pun pengawa laban peniri ubung meseti chau enggau peniri sidan.

“Pengawa keterubah iya nya ngirit ubung laban peniri ubung meseti chau enggau peniri sidan.

“Ngepun pengawa betenun tu liat amat dikereja. Nya kebuah, endang begunaka pengeliat ati enggau pengepuh lebuh ngereja iya.

“Baka kitai ke milih serat ubung ukai sengapa. Serat ubung dipilih dikena betenun bepelasarka kualiti, penegap, lembut enggau engkeman chura dikena nentuka ubung ti bekualiti tinggi.

“Serat taya deka diperesika dulu, dirangkaika, diluruska lalu ditusun sebedau digaga nyadi ubung.

“Serat ubung tu tadi diputar ngena gasing ubung nyentukka iya nyadi ubung ti panjai enggau penebal ti engkeman dikena.

“Udah nya, ubung ditusun enggau kemas, diluruska sereta ditegang ngambika enda tusut sereta nyamai dikena maya nganyam buah kain.

“Ubung pakan enggau ubung lungsin ditusun enggau berurun sereta nitihka kira ti betul ngambika ulih ngasilka chura enggau buah kain Karap ti dikedekaka,” terang iya lenak.

Manggie madah baru, lungsin nya disediaka enggau chara nyukat, nusun, sereta ngatur benang nitihka pemanjai enggau pemayuh ti diguna sebedau iya dipasang ba tenun.

Seraya kereban ti dikena ba ripih pengawa nya nyengkaum benang lungsin, benang pakan, benang emas enggau pirak, perengka tenun, enggau kereban baka belia, ripang, jengkuan enggau ke bukai.

“Ubung tu dipasuk ba tenun nitihka atur enggau irit tauka ngirit ubung ti udah ditetapka.

“Ripih pengawa tu enda tau enda dipejalaika enggau silik dikena nentuka endur ubung nya betul.

“Ubung mega ditusun bepelasarka sukat Irit, chura, enggau tusun ti spesifik.

“Kebuah pia laban tiap-tiap tusun nya meseti chun ngambika motif baka Buah Lelambak, Buah Mata Puna, Lingkuk Wi, enggau Puchuk Tubu ulih ditempa enggau kemas.

“Nya alai, chura enggau buah kain digaga ngena teknik nganyam buah enggau niap ubung pakan sereta lungsin enggau bejimat,” ku iya nerang.

Nambahka nya ku Manggie, chara nenun ubung lungsin enggau ubung pakan nyadi kain nya siti pengawa ti pemadu beguna laban nyadi ke pun penyadi buah kain.

Iya mega madah, ubung lungsin deka diatur nitihka pemanjai ba tenun, lalu ubung pakan dipasukka beselat ba selang lambar ubung ti udah ditetapka.

Lalu kededua set ubung nya ditarit terit lalu ditenun nitihka sukat ti spesifik dikena mansut ke motif anyam tauka buah kain, ku iya nerang baru.

PENGAWA KEMAS

Pengudah pengawa nenun nya tembu, ku Manggie, kain nya diperesa sereta dibungkus manah-manah.

Nambahka nya, ku iya, sebarang bagi kain ti begunaka sambung lalu dijait begulai.

“Kain nya mega diperesa dikena nentuka iya beresi sereta nadai penimpang sebedau dikena tauka dijual.

“Kain karap meseti dibungkus sereta dibantaika enggau kemas dikena nentuka iya dijaga sereta narit ati pemeli ngena asil ti bekualiti.

“Kitai mega dekaka makit ti efektif sereta ngintu motif asal ti tulin ulih ngasuh kain Karap nyadi pun penatai pemisi kitai jemah,” ku penemu iya.

Manggie madah, sekumbang nenun kain karap, pengawa pemadu beguna ba iya, iya nya maya ngirit enggau nganyam buah sereta ngira ubung enggau betul.

Kebuah pia laban pengilap ti mit pen tau ngasuh motif tauka buah enggau chura semua kain nya enda seriris tauka setipak, ku iya.

“Semua penemu beguna tu diajar aki aku empu, Sandine Bennidect lalu iya mih nyadi guro aku ba pengawa betenunka kain karap tu.

“Iya orang ti chukup ituk ngiring enggau ngembiang aku, nadai kala leju ngelara ngena jaku ti siru ngambi aku enda nandu pengilap.

“Nya alai, aku ngasaika diri chukup benasip bisi orang dulu ngerandang jalai dikena aku ngemansangka diri ba pengawa asal tu.

“Aku ngarapka diri ulih nyulur legasi aki Sandine tu ngambi tenun kitai Iban terus bediri gah sereta pegari nyadi identiti bansa ti ngemegahka Tanah Kenyalang ba mata dunya,” ku iya mantaika juluk ati.

NYABUNG PENEMU

Ngena peluang nya, Manggie meri besai terima kasih ngagai raban IWCT udah ngatur pengawa ti chukup manah laban tu siti ari chara dikena meransang raban nembiak rebak baru baka iya empu ngambi rindu agi ke seni kraf kitai Iban.

“Aku meri terima kasih ngagai IWCT laban udah milih kain Tenun Karap ti ditenun aku. Bulih perais lumur tiga pen aku udah chukup gaga sereta temegah endar asai.

“Terima kasih besai mega ngagai guro tauka pengajar aku, aki Sandine laban ngasuh aku ngangkatka budah kain karap lama sida ini tuai, ke chukup lama sereta mayuh pemar lebuh aku ke nenun iya ketegal ke ukai buah kain sengapa.

“Tambah mega, Kategori Tenun Kain Karap tu bisi lebih 100 pemekit tang aku nyanggup diri bepekit sereta enchabar diri nyabung penemu enggau pengelandik dikemisi.

“Puji Tuhan, pengawa mujur datai ba adan lalu bisi asil dipeda lalu dibai pulai ke Batang Kemena ila,” ku iya mantaika pengaga diri.

Manggie madah, penama enggau pejuluk kain karap disabung iya bepekit ba IWCT empai lama iya nya Anak Remaong Tujuh, Nyawa Rauh Rauh Minta Giga Ka Sampi Lukan Ngerang, nya nama lalai iya, laban buah kain jelu mangah.

Rerak Bulan Purnama, Manchar Malam Serata Dunya, Rirang Duduk Meuga-Uga, Ingatka Senaya Dayang Bintang, nya nama tempa iya kelimpah diberi pejuluk Buah Remaong Anak.