KUCHING: Tuai Pemegai Menua (TYT) Tun Pehin Sri Abdul Taib Mahmud nerima ‘Anugerah Pencapaian Sepanjang Hayat’ serimbai program Anugerah Tungkap Dagang Antarabansa (IBR) Borneo ti keterubah diatur ba Kuching.
Pengawa meri anugerah nya dipenyadi Premier Datuk Patinggi Tan Sri Abang Johari Tun Openg enggau Tuai Pemesai Eksekutif Kumpulan IBR Asia Datuk Beatrice Nirmala seraya TYT diarika Sapit Menteri Utiliti enggau Telekomunikesyen Datuk Dr Abdul Rahman Junaidi.
Lebuh bejaku, Abang Johari meri tabi puji ngagai Tun Taib ba anugerah ti diterima iya ti diperati chukup engkeman nitihka jasa iya ngagai menua ngelama tu.
“Aku andalka iya bisi enggau kitai ditu, iya (Tun Taib) siku Apai Pemodenan Sarawak lalu sigi endang patut nerima anugerah tu,” ku iya.
Abang Johari bejaku munyi nya rambau Program Anugerah IBR Borneo 2023 ba sebuah hotel tebilang ditu, malam tadi.
Ba program nya, Anugerah IBR Borneo diberi ngagai pemain industri ti bekaul ungkup meri basa ngagai penyulut raban serikat di Sarawak.
