KAPIT: Inisiatif Turu Pelajar Baleh terus ngesan pangku pengawa besai meri peransang ngagai nembiak di pelilih nya nampung pelajar ngagai renggat ti tinggi agi.
Chairman Turu Pelajar Baleh, Datuk Wilson Ugak Kumbong madah, pekara nya beguna laban pelajar nyadi pugu pemadu tegap nempa kuing rebak biak dudi hari.
Iya madah, inisiatif meda bala anak Baleh nyingkang ke mua ba pelajar seruran nyadi pengandal enggau pekara ditegi sida begulai.
“Genap bantu ti diberi ari turu tu ukai semina bantu belanja aja tang siti kelai sukung enggau pengandal kitai ngagai pengulih bala anak di pelilih Baleh.
“Pengandal kitai endang nyengala iya nya deka meda bala anak di pelilih tu nyingkang jauh agi, ngulih penemu ngagai tinggai ti tinggi sereta ulih mantu ba pemansang komuniti enggau tunga kuing Baleh dudi hari,” ku iya.
Ugak bejaku munyi nya ba sebengkah penerang Facebook serimbai Program Nyua Insentif Pelajar Turu Pelajar Baleh 2025 ditu, sehari tu.
Tampung iya, nya siti ari inisiatif ti ditumbuh dikena mantu ngelempung tating belanja apai indai sereta meri peransang ngagai nembiak di pelilih Baleh nampung pelajar sida.
