Ubah mih peragam negatif ngagai ‘Indai Blues’

INFO
Gelar Indai Blues tu nadai ngira strata siku orang nya tauka tikas ekonomi sida tang nya ulih nyadi ngagai sesapa aja.

KOTA SAMARAHAN: Peragam negatif mensia mayuh lebih agi ngagai raban indai tunggal patut diubah.

Pengelicha Fakulti Sains Sosial dan Kemanusiaan (FSSH) Dr Lucy Sebli Seidelson madahka ba siti pansik dipejalai iya ngagai raban indu dalam komuniti Iban, gelar ti enda manah ngagai ‘Indai Blues’ iya nya siti gelar ngagai sida indu ke bisi anak tang udah ditinggalka laki patut diubah.

“Peragam ti enda manah ngagai sida (indai tungal) ke disengkaum dikumbai Indai Blues tu kelebih agi dalam komuniti Iban patut diubah laban pekara ti nyadi ngagai sida ukai dikedeka sida.

“Taja pia, komuniti terus bejaku, berandau sereta nyalahka tiap bengkah pekara ti dipejalai sida,” ku iya.

UBAH PERAGAM… Dr Lucy Sebli Seidelson

Dr Lucy madah munyi nya lebuh dirandau Suara Sarawak pengudah Seminar ‘Iban bejalai: Its effect on Iban Women in Contemporary Sarawak- A Case of Indai Blues’ Ke-4 ti diatur The Dayak Chair ba Bilik Aum FSSH Unimas ditu, kemari.

Nangkan nya ku iya, dalam pansik nya, iya bekunsika pekara ti ditegi enggau ditapi raban indu dalam komuniti Iban kelebih agi lebuh sida ditinggalka laki sida bejalai begigaka belanja ke ruang bilik sida.

“Pemar enggau gaya idup diatu tentu mejal sida neruska gaya idup ti dikumbai ‘Indai Blues’.

“Komuniti suah bejai sida enggau mayuh macham pekara lalu nadai berundingka kebuah sida ngereja pekara ti baka nya,” ku iya madah nyemetak.

Kelimpah ari nya, Dr Lucy mega madahka siti ari kebuah pekara nya nyadi tadi ketegal ari penanggul ekonomi ti seruran enda tentu.

“Lebuh kitai ngelansa pasal bejalai tu, nya siti ari adat Iban alai sida ke laki patut bejalai tauka dikumbai belelang ngiga belanja tauka nupi diri sebilik.

“Taja pia, berindik ari gaya ekonomi diatu, nadai siku meri fokus ngagai sida indu ke bejalai kelebih agi ba pengidup enggau pemar ti ditapi sida lebuh laki sida bejalai,” ku iya nerang silik.

Udah nya ku iya, gelar Indai Blues tu nadai ngira strata siku orang nya tauka tikas ekonomi sida tang nya ulih nyadi ngagai sesapa aja.

“Mayuh entara sida tu ngembuan profil lalu dikelala mensia mayuh tang sida tu pemadu mayuh merinsa enti dibanding enggau orang ke bukai.

“Sekeda ari sida sanggup ngetat diri merinsa enggau rumah tangga 20 ngagai 31 taun laban sida enggai dikelala nyadi orang ti puntan ba rumah tangga,” ku Dr Lucy.

Nitihka penerang ari Dr Lucy, urung 25 iku orang indu ari menua Sibu, Kanowit, Teku, Bawang Assan, Balingian, Sibu Jaya enggau Kapit nyadi responden dalam pansik ke digaga iya.