SPAOH: Betatika nasip 28 ruang bilik ke tasah angus ba Rumah Panjai Matop, Paku, Spaoh ngasuh Sapit Premier Sarawak, Datuk Amar Douglas Uggah Embas ke benung ba rantau jalai pulai ke Kuching nikal baru ari Lachau ngambi meda kediri empu penusah nya, malam kemari.
Iya berumban ngesah ngagai endur penusah pengudah nerima berita bekaul penusah angus ke nyadi urung pukul 5 lemai nya ungkup ngesah sida ke tasah sereta nentukа bantu diguna ulih diberi jampat.
Lebuh ba endur penusah, Uggah bisi diterang bekaul pengawa ngera api sereta berita tikas penusah rumah panjai 28 pintu nya.
Iya bela bisi ngerandau sida ke tasah seraya meri jaku peransang enggau madahka penyinu ati ke nasip bala ti lenyau endur diau.
Kelimpah ari nya, iya beratika pengawa nyeraris bantu ke patut dirumban nengah Opis Pengintu Pengelantang Mensia Mayuh (JKM) Sitak Betong enggau Opis Residen Sitak Betong.
Sama enggau iya ngesah penusah nya Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu enggau Kaban Parlimen Betong, Datuk Dr Richard Rapu.
Seraya Pegawai Pelilih Betong ke mega Chairman Komiti Penyanggа Penusah Pelilih (JPBD) Betong, Laga Kueh madahka nadai penusah bedadi nyawa diropot ba penusah nya.
Ku iya, Palan Ngenduh (PPS) enda disedia kandang diatu laban semua 28 ruang bilik nya deka ngenduh dulu ba rumah diri sebilik enggau kaban belayan ba rumah panjai semak nya.
Pengawa nyeraris bela diatur begulai enggau Opis Bomba enggau Penyah Penusah Malaysia (JBPM) nengah Balai Bomba enggau Penyah Penusah (BBP) Betong enggau Saratok, Raban Bomba Volunteer (PBS) Pasar Betong sereta Polis DiRaja Malaysia (PDRM) dikena nentukа operasyen ngera api enggau pengelikun endur penusah lanchar.
Berebak enggau nya, JKM Bagi Menua Betong deka ngatur rejista tuai ruang bilik (KIR) ngambi bantu nyengkaum pemakai, ai irup enggau utai diguna pemun ulih diberi ngagai sida ke tasah.
Naka pukul 8.30 malam, operasyen ngera api dipejalai lalu api empai padam magang.
Perati silik enggau pengawa nyeraris bantu ngentak baru rumah panjai nya deka diperunding pengudah ripot raban bomba enggau banchi sida ke tasah diterima.
Sama datai, Residen Bagi Menua Betong, Datuk Richard Michael Abunawas, Pegawai Tadbir Nguasa Pelilih Mit Spaoh, Denny Lim, Pegawai Ngintu Pengelantang Bagi Menua Betong, Abang Ahmad Ibrahim enggau Sekretari Politik Premier Sarawak, Roseline Mapong.-EDISI UKAS


