Bisi kebuah Perintah Besai apin ulih neritka atur nembiak biak ari 18 taun ditagang bejalai mindah malam hari

KUCHING: Atur tagang bejalai mindah malam hari diterit ngagai bala nembiak biak ari umur 18 taun ti enda nyadi dipejalai, enda muntang baka diperagam.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Fatimah Abdullah madah, raban ti deka bejalaika atur tagang nya patut betanyaka penerang ari perintah besai nama kebuah tagang nya enda nyadi dipejalai.

“Bejalaika siti-siti atur tagang enda muntang baka disebut.

“Barang sapa deka neritka atur tagang tu patut dulu agi betanya ngagai perintah besai nama kebuah iya enda nyadi diterit,” ku iya seraya nambah, langgur penemu perintah nagang nembiak biak ari 18 taun ti diperambu berengkah dipejalai Januari tu tadi.

Taja pia ku Fatimah, perintah besai patut meri penerang sereta berandau silik agi sentang langgur penemu nya ngagai semua raban.

“Bejalaika atur tagang tu enda baka diperagam. Ambika chunto, ari sukut batang tubuh raban diselinting, nyangka sekeda apai indai enda sedar anak sida bejalai mindah ke bukai ketegal alah dibai bala bakih enggau media rama.

“Ba pekara tu, apai indai patut beratika ulah enggau pemindah bala anak sida,” ku iya.

Fatimah mansutka jaku tu lebuh ditanya sentang atur tagang bala nembiak biak ari 18 taun bejalai mindah ke bukai enda nyadi diterit baka ti udah dibantai ba Aum Parlimen, apin lama ke udah.

Nangkan nya ku Fatimah, apai indai patut bisi atur sida empu dikena matau pejalai enggau pengawa bala anak ba rumah.

Sapit Menteri Besai Datuk Seri Dr Wan Azizah Wan Ismail bisi mansutka jaku atur tagang bala nembiak ari 18 taun bejalai mindah ke bukai malam hari apin nyemetak diterit ba menua tu.

Taja pia ku iya, perintah deka berunding bejalaika atur tagang nya ba endur ti ‘angat’ kelimpah ngingatka apai indai seruran berati enggau matau bala anak sida bisi ba endur ti likun sereta enda nejuka tanggungpengawa sida ngagai raban perintah aja.