KUCHING: Opis Kereja Raya (JKR) Sarawak diuluka Direktor, Dr Cassidy Morris, bisi ngatur penemuai basa ngagai Opis Unit Komunikasi Awam Sarawak (UKAS) ditu sehari tu tadi.
Direktor UKAS, Awang Putrayusrie Awang Redzuan, nyambut penatai raban JKR Sarawak ti disempulang Sapit Direktor (Infrastruktur), Ir Wisil Lichok, Sapit Direktor (Begunan enggau Pakar), Sharifah Liz Farawati Wan Omar, Sapit Direktor (Servis Teknikal), Ts. Meehan Jorai, Sapit Direktor (Sektor Modal Mensia enggau Pekara Korporat), Josenthiana Manggie, sereta pengari Sapit Direktor (Aset), Ts. Mohammad Saifrol Sheikh Naimullah.
Penemuai diatur enggau tuju negut kerejasama ba pekara komunikesyen awam, kelimpah negap kerejasama ba pekara bukai entara UKAS enggau JKR Sarawak.
Awang Putrayusrie bisi meri penerang senentang tanggung pengawa UKAS ti nyadi media rasmi Perintah Sarawak ba pengawa nyadung penerang rasmi perintah ngagai rayat.
Iya mega andalka kerejasama antara UKAS enggau JKR Sarawak ba atur nyadung penerang bekaul projek pemansang ungkup rayat.
Ba jaku balas iya, Cassidy madah, penemuai diatur enggau tuju ngelala sereta meretika operesyen enggau chara kereja UKAS, kelebih agi ba chara nyadung penerang senentang mayuh bengkah projek rayat, pejalai projek sereta timpuh tembu projek ti dipejalai JKR Sarawak.
