Ulah Edwin dikerindu peranak Pakan

PAKAN: Penemu enggau ulah ensuruk nyadi batang kebuah penatai Edwin Bandang semampai dikerindu rayat enda ngira umur ba sitak Kunsil Nengeri (DUN) Pakan.

Iya ti ngining bediri nengah tikit PDP-GPS (Parti Demokratik Progresif/Gabungan Parti Sarawak) mega dikerindu bala raban nembiak menua nya.

Kena hari Enam tu tadi, Edwin bisi ngulu Pekit Sepak Takraw ke diatur raban nembiak Merampu di Batang Sugai, Pakan.

Maya tu, iya bisi meri jaku tangkan ngagai bala penyereta pekit seraya madahka pekit nya engkeman diatur dikena ngerapitka agi kaul enggau pangan diri.

Ku iya, kelimpah pulaika pemanah pengerai, pekit baka nya siti ari kelai pemanah enggau pengelikun pengidup diri rumah panjai.

Berebak enggau tu mega, Edwin bisi nyuaka pemeri ari iya ngelai nyukung pekit ke diatur raban nembiak nya.