SRI AMAN: Pengawa muka mayuh agi skim umai paya bedandang besai nyengkaum di Sarawak nyadi inisiatif signifikan asil kerejasama rat entara perintah nengeri enggau Perintah Besai dikena nyapai tikas sara diri (SSR) berau sepenyampau 80 peratus.
Menteri Betanam Betupi enggau Jamin Bekal Pemakai, Datuk Seri Mohamad Sabu madah, Malaysia sebedau tu mujur nyapai SSR padi urung 71 peratus tang diatu nurun ngagai 53 peratus.
“Tu mandang kitai agi ba tikas ti patut ditegap lalu nya kebuah kitai meri perati ngagai pengawa muka baru umai paya bedandang besai.
“Umai tu ila deka diatur serikat peribit lalu perintah nengah Opis Menteri Betanam Betupi enggau Jamin Bekal Pemakai (KPKM) bela deka mantu.
“Opis menteri nerima manah sukung tegut ari Premier Sarawak ba pengawa nangkir tauka muka mayuh agi umai paya bedandang besai.
“Enti mayuh agi umai bedandang besai ulih dikemansang, tu ulih nyamin bekal pemakai menua kelebih agi bekal berau ngambi kitai enda irau ati,” ku iya.
Mohamad bejaku munyi nya ba aum pemberita pengudah bejadi Program Gelumbang Padi Sarawak: SMART Bumai Padi Bedandang Besai (SMART SBB) sereta Hari Ngundang Penguna IADA Batang Lupar 2026 ba Balai Sri Nangkai, Gran Stumbin ditu, kemari.
Terang iya, KPKM seruran nyukung aspirasyen Perintah Sarawak ngemansang sektor betanam betupi dikena nambah pengawa mansut bekal padi lokal kelimpah ngurang pengawa bepanggai ba import berau.
“Ungkup timpuh panjai, inisiatif negap bekal pemakai menua patut diberi perati nengah pengawa muka mayuh agi umai paya bedandang besai kelebih agi di Sabah enggau Sarawak.
“Aku bisi dipadah sekeda aum begulai perintah nengeri bisi diatur dikena ngaul bemacham raban dikena ngiga chara pemadu manah nambah pemesai palan nanam padi menua,” ku iya.
Iya nyemetak madah, pemujur industri padi enggau berau ukai semina bepanggai ba polisi perintah aja tang begunaka pengeransing bala orang bumai.
Ku iya, perintah udah nyendia bemacham perengkaguna nyengkaum infrastruktur, teknologi enggau insentif tang pemadu beguna iya nya ubah ba ulah enggau pelasar orang bumai.
“Kitai patut ngalih ari chara lama ngagai chara moden, ari gawa kediri nyadi gawa beraban nengah gerempung kerejasama tauka kluster betanam betupi.
“Aku andal nengah pengawa bumai ti sistematik agi, nyikap orang bumai ngena penemu, nyendia teknologi moden pemadu baru sereta ngemanah infrastruktur entali ai, penyulut pengawa mansut padi di Sarawak deka terus ditegap,” tampung iya.
Ba program nya, Mohamad bela nyua bantu projek pemansang betanam betupi sepenyampau RM6.9 juta.
Bantu nya mungkur pengawa nyendia input enggau mesin betanam betupi, pengawa meresi genturung padi paya sereta nyeruri jalai kebun, sistem parit enggau entali ai dikena nyukung pengawa betanam betupi moden di sitak nya.
