Umbas nitih chara lama betanam buah

SPAOH: Chara nanam sereta ngelakka pun rian ti nadai diintu meruan sebagi ari chara lama nanam buah ke patut diubah.

Sapit Kepala Menteri Datuk Amar Douglas Uggah Embas madahka pekebun buah patut nyaga utai tanam, meri baja ti engkeman enggau meresi palan nanam buah dikena nentuka pun buah ditanam sida ngasilkan buah ti lebat lebuh musim buah.

“Diatu, kitai udah mengeksport ‘pes’ rian ngagai menua China ke alai peminta bekal produk nya ngelui ari pengulih kitai.

“Kitai udah mujur eksport 200 tan ari 100 tan ba taun siti nyin kemari lalu China agi begunaka mayuh agi,” ku iya.

Uggah ti mega Menteri Betanam Betupi, Tanah Adat enggau Pemansang Kandang Menua nyadi temuai ti dipebasa meri jaku lalau begulai enggau peranak Rumah Bangkit Rembai Baru lebuh ngintu ulang taun ke-20 rumah panjai nya ditu, kemari.

Ku iya, Perintah Nengeri bisi nyendiaka palan ngumpul, proses enggau mungkus (CPPC) buah di Simpang Layar ba Betong dikena bedagang.

“Palan tu iya ti kedua di nengeri lalu dipelaba ulih diguna ba bulan Mei taun baru,” ku iya.

Iya mega, madahka mayuh agi kus ngintu sereta nyaga pun rian deka diatur ngagai orang bekebun buah taun baru tu ila.

Ku iya, kelimpah rian, Perintah Nengeri mega mai orang ti bekebun buah nanam buah bukai baka nanas, nyiur enggau pisang.

“Tu meh chara baka ni perintah deka mantu rayat menua pesisir ngemansangka sosio-ekonomi sida,” ku iya.

Udah nya, iya lalu meri agih belanja RM60,000 ngagai rumah panjai nya, RM20,000 ngagai Komiti Pemansang enggau Pengelikun Genturung Pendiau (JKKK) enggau RM3,000 ngagai Biro Indu kampung nya.

Sama bisi datai Kaban Parlimen Datuk Robert Lawson Chuat ti mega lalu meri bantu RM5,000 ngagai JKKK kampung.