KUCHING: Pedagang disarankan ninggalka industri rokok elektronik (vape) lalu ngalih ngagai sektor ti lebih bemanfaat enggau ulih meri pemaik ngagai komuniti.
Timbalan Menteri Nembiak, Lumba enggau Pemansang Orang Dagang, Datuk Dr Ripin Lamat madah, inisiatif nya patut dipejalai laban empas enda manah ari pengawa nguna vape dalam raban nembiak nyau ngirauka ati.
“Pengawa nguna vape ulih meri empas enda manah ngagai komuniti sereta ulih ngerusak institusyen keluarga, komuniti enggau menua.
“Ai vape mega ulih ngerusak rebak anak biak kitai enggau rega diri sida di hari datai.
“Nya alai, pedagang patut ngalih ngagai sektor bukai ti ngemeran agi pemaik ngagai komuniti,” ku iya.
Ripin mansutka jaku nya rambau dirandau pemberita pengujung bejadi Karnival Pengerai Pandu Puteri ti diatur Gerempung Pandu Puteri Malaysia (PPPM) Pampang Sarawak di pelaman Majlis Bandaraya Kuching Selatan (MBKS) ditu, kemari.
Iya nyukung mega inisiatif Perintah Sarawak ti munas nagang pengawa nyual enggau nguna vape laban empas negatif sida nya lebih besai ari pemaik ekonomi.
Tampung iya, program pencegahan baka meri pengeleda enggau pelajar mega patut digaga.
“Kitai mega begunaka kerejasama ari apai indai, institusyen keluarga, perintah enggau gerempung ukai dikuasa perintah (NGO) kena ngurang berenggat pengawa nguna vape.
“Pengawa nerit undang-undang mega beguna amat lalu atur nya meseti diterit,” ku iya nyemetak.
Dulu ari nya, Menteri Pemansang Indu, Nembiak Mit enggau Pengelantang Komuniti, Datuk Seri Fatimah Abdullah madah, Akta Kawalan Produk Merokok Demi Kesihatan Awam 2024 (Akta 852) deka berengkah diterit kena 1 Oktober tu.
Terang iya, nya beguna amat kena negap inisiatif nagang pengawa nyual vape di Sarawak.
“Pengawa nerit akta tu mega deka dikerembai ngagai raban bekuasa lokal (PBT) di nengeri tu.
“Perintah Sarawak beletak munas ngurang pengawa nyual enggau nguna vape berindik ari kes ai vape ti dichampur enggau perengka ditagang baka dadah sintetik ti makin nambah.
“Kitai benung bejalai nuju pengawa nagang vape tang diatu kitai berengkah enggau inisiatif sementara baka ngelaban ngena program pengeleda enggau pelajar sereta mensia mayuh,” ku iya rambau pemberita kena 22 Ogos tu.
Fatimah madah, Sarawak diatu ngerikod tikas nguna vape pemadu tinggi di Malaysia ba raban nembiak umur 13 nganti 17 taun, nya meh 39,608 iku enti dibanding 23,733 iku ba taun 2017.
“Naka diatu, Opis Pansik Penyalah Narkotik (JSJN) Sarawak bisi ngerikod 14 kes ti ngaul 20 pengawa nangkap bekaul dadah dalam vape nyadi ari taun 2023,” ku iya.
