Mary Queen landik bejaku sereta bepenau

Kumang Gawai Betong 2019

BETONG: Siku Eksekutif Pengatur Pengawa ba sebuah serikat swasta, Mary Queen Ambrose Karim,25 dipadu ngempu gelar Kumang Gawai Bagi Menua Betong 2019 rambau Pengawa Makai Lemai Gawai Dayak Renggat Bagi Menua Betong ti diatur di Balai Raya Lumba Tan Sri Datuk Amar Stephen Kalong Ningkan, lemai kemari.

Pemenang tu endang udah dipelaba mensia mayuh ke bisi datai ngulu pengerami tu.

Nyadi champion tu ngujungka ‘dara bajik’ asal ari Betong tu mai pulai perais duit RM2,200 besereta selampai Kumang, trofi, segulung bungai, hamper, tepa enggau setipikit.

Iya dipeda ngembuan pengelebih ari sukut pengelandik bejaku sereta penau bukai.

UNGKUP KENANG… Douglas Uggah, Alfred Jabu, Robert Lawson Chuat sereta temuai ke bukai begambar kenang enggau Mary Queen, Elizabeth Lydiana sereta Ullia Ulanda Rumpang rambau Pengerami Makai Lemai Gawai Dayak Renggat Bagi Menua Betong ti diatur di Balai Raya Lumba Tan Sri Datuk Amar Stephen Kalong Ningkan, lemai kemari. -Gambar OSMAN RAZALI

Pengajar latih betanda enggau Zumba nya mega diberi anugerah ngepan pemadu manah seraya disediaka perais duit RM500.

Nangkanka nya, gelar Lulong Gawai dipenggi Elizabeth Lydiana Bujang, 19 asal ari Sibu.

Iya diatu benung belajar ba Kolej Matrikulasi Labuan nerima perais RM1,700 besereta trofi, bunga tangan, hamper, tepa enggau setipikit.

Kelimpah nya, nembiak Politeknik Kuching dalam bidang injinir Ullia Ulanda Rumpang, 20 bulih gelar Selinggar Matahari Gawai.

Iya ti asal ari Kuching mai pulai perais RM1,200 besereta trofi, gupung bungai, hamper, tepa enggau setipikit.

Lima penyereta bukai Pekit Kumang Gawai ti kurang benasit manah iya nya Maria Madelina Sujie, 23 (Kuching), Catherine Annda Thomas, 21 (Saratok), Marvis Rirak Mandau, 27 (Betong), Helena Vanissa Humphrey, 21 (Betong) enggau Caroline Yak Eka, 21 (Betong).

Semua bala penyereta mega diberi perais pengaga ati mata duit RM700 besereta trofi, bungai, hamper, tepa enggau setipikit.

Semua perais disuaka Tan Sri Dato Sri Empiang Jabu enggau Datin Claudia Janting seraya dikemata Sapit Kepala Menteri Datuk Amar Douglas Uggah Embas, Penyanding Penemu Sains Pansik Nengeri Patinggi Tan Sri Alfred Jabu Numpang, Kaban Parlimen Betong Datuk Robert Lawson Chuat enggau Kaban Kaunsil Nengeri (Adun) Layar Gerald Rentap Jabu.

Bela datai rambau pengerami tu Sektretari Politik Kepala Menteri Dr. Richard Rapu, Residen Bagi Menua Betong Friday Belik, Direktor Kolej Vokasional Betong ti nyadi Chairman Komiti IndukPengerami Lim Ah Juan, Pemesai Pelilih Betong Sofhi Jebal, Ketuai Gawai Temenggung Richard Mulok Entering sereta Kumang Gawai Bagi Menua Betong 2018 Sophia Benet @ Denot (2018).

Ba taun tu, Sekula Sekondari (SMK) Datuk Patinggi Kedit sekali agi diberi tanggungpengawa nyadi pengatur pekit tu betuaika pengajar Sigat Sang.

Suara Sarawak